Raltlan lut thar leh mai thei

Raltlan lut thar leh mai thei
Mizoram dep Myanmar hmun thenkhatah an inkap leh a, Mizoram khaw thenkhatah raltlan an awm thar leh mai thei tih thu dawn a ni.
Champhai district dep Myanmar lamah nikum atang khan Hualngo People’s Organisation (HPO) te’n ro an rel a, anni hi Chin National Defence Force (CNDF) nen an inkap a ni.
Thu dawn danin, July ni 2 chhun atang khan HPO leh CNDF hi an inkap a, Ningani tlai lamah pawh khan Kawtsei velah an inkap.
Zokhawthar bul Myanmar lama awm, Khawmawi, Rih, Lianhna, Hmunluah leh khaw dang thenkhatte pawh an ralmuang lo a, an khuaah silai la puak lo mah se mipui an ralmuang lo tih thu dawn a ni.
Nikum kum tirah khan Khawmawi leh a chhehvela Myanmar sorkar sipaite leh anmahni paih tuma beitute nasa takin an inkap a, Myanmar sorkar hi a tlawm zawkah an tan avangin, HPO hian Champhai district depa Hualngo khaw hrang hrangah ro an rel zui a ni.
Nikum kum tira an inkah hian Zokhawthar vel pawh an ralmuang lo a, silai ri an hre phak mai ni lovin a si per an tawng ang tih hlauvin an awm. Kuminah chutiang khawp chu an ni rih lo a, mahse Myanmar lam hi an buai zui a nih chuan Zokhawthar leh khaw dangah raltlan an lut thar leh theiah ngaih a ni.