Raltlan naupangte sikul luhtir turin sorkarin hriattir

Myanmar leh Bangladesh atangin Zo hnahthlak a sing tel Mizorama an raltlan hnuah Manipur-a Zo hnahthlakte Mizoramah an tlanlut leh a, Mizoram sorkar chuan Mizorama tlanlut naupangte sikul luhtir a tum.May ni 24 khan school education director Lalsangliana’n district education officer, sub-divisional education officer leh sorkar enkawl higher secondary school principal zawng zawngte hnenah lehkha a thawn a, an huam chhunga raltlan naupangte sikul luhtir turin a hriattir.
Tun hnaiah Manipur an buai avangin Mizoramah mi engemaw zat an raltlan a, raltlan naupangte’n an tlanchhiatna hmuna lehkha an zir chhunzawm hi danin a khap lo tih sawiin director chuan, raltlan naupangte’n sikul an kal theih nan mahni huam chhung theuhva hma la tura ngen an ni tih a ziak.
Raltlan naupangte’n harsatna awm lova tluang taka admission an tih theih dan tur duang turin a ngen bawk.
Education minister Lalchhandama Ralte chuan Myanmar atanga Mizorama raltlan naupangte chu Mizoramah sikul luhtir an lo nih tawh thu leh, Bangladesh atanga raltlan naupangte pawh sikul luhtir mek an nih thu te a sawi a, Manipur atanga Mizorama tlanlutte pawh sikul luhtir tum leh an ni tih te a sawi.
“Kan unaute an ni a, mangangin Mizoramah an rawn tlanlut a, Mizoram sorkar a theih ang angin a lo tuamhlawm a, zirna lamah pawh enkawl zel tum an ni,” tiin minister chuan The Aizawl Post a hrilh.
“Mizoramah nationalist sorkar a ding a, Mizoram state pawna Zo hnahthlakte hi he sorkar hian a hre reng a, chuvang chuan Mizorama tlanchhiate pawh hi Mizoram sorkar hian duhsak takin lehkha a zirtir a, zirtir zel pawh a tum a ni,” a ti bawk.
Bangladesh atanga raltlan rawn lutte hi academic session tawp lama rawn lut an nih avangin sikul luhtir nghal rum rum an ni chiah lo tih a sawi a, session thar tan rualin an awmna khua theuhvah sikul hi luhtir niin, a thleng thar an awm a nih pawhin luhtir zel tum an ni tih a sawi. Tuna Manipur atanga Mizorama tlanlutte pawh sikul luhtir zel tum a ni a, chutiang tur chuan school education department-in theihtawp a chhuah tih a sawi bawk.