MLA inthlan neih turah MNF party chuan candidate siam dan turah buaina a nei lo tih MNF president, chief minister Zoramthanga chuan a sawi.Nilainia Serlui MNF Joint Block Conference vawi 6-na Vairengtea neih a hmanpuinaah MNF president chuan kumin kumtawp inthlanpui awm turah MNF chuan candidate turah buaina an nei loa, ZPM chuan green signal pek thuah an nei nual tih sawiin, “Working president-in candidate turin a sawm a, Leader a lokal veleh a, midang a sawm leh a. Sawrkar hnathawkte pawh thu tiamin an pension tir a, an inthuah ta tup mai a ni. Keini erawh chu kan boruak a kang chho tual tual a, sawrkarna kan siam ngei dawn a ni,” a ti.
Pathian leh mipui zarah kumtawp inthlanah MNF chuan sawrkarna a chang leh dawn tih a sawi a. Mizo Union auhla chu – ‘Mizo Union, kan ram tan’ tih a nih laiin, MNF-in a tir atanga Pu Laldenga hoa an thuthlung leh tun thlenga an thupui chu ‘Pathian leh kan ram tan’ tih a nih thu a sawi. Mi thenkhat chuan an thuthlung, an innghahna pawh pawl an thlak apiangin an thlak zel tih a sawi bawk.
Covid curfew karah dam khawchhuah kha kan tum lian ber a ni tawp tih chief minister Zoramthanga hian sawiin, “Tun term kal mek hi tuarchhel hun a ni. Pathian leh mipui zarah sawrkarna kan siam leh ngei anga, chu hun chu malsawmna hun a ni dawn. Mizoram tan hmasawnna, malsawmna tinreng dawn hun a thleng thuai dawn,” a ti.
Chakma vote an mamawh loh thu aupuitu khan Chakma ADC-ah candidate an dah a, NOTA-a tla zat pawh vote an hmu pha lo tih MNF hruaitu hian a sawi a. Hotu pahnih inbeihna hmuh tur awm fo chuan an dinhmun that loh zia a tichiang hle tih a sawi a ni.
MNF-in candidate turah buaina a nei lo – Zoramthanga
Get real time updates directly on you device, subscribe now.