Vaivakawn thlanmual bul, National Highway 54 kawngpui chung leimin chuan kawngpui bakah a bulhnaia cheng chhungkaw engemawzat a nghawng belh zel a, a vaiin chhungkaw 16 an inthiarchhuak tawh.
Tunhnaia ruahtui tlak tam hnu, June 16 khan helai kawng, in sak mekna zawnah hian lei a min a, in sak lai pawh a chim hnan a ni. Kawng hian NH 54, Lengpui/ Sairang panna kawngpui ber hnawhin nunphung a tikhaihlak deuh a ni. Hemi tum hian chenna in pathum luahtu chhungkaw 11 chu venthawn thilah an inthiarchhuak a ni.
Kawngpui hi then a nih hnu in a che zui loa, tunhnaia ruahsurah July 3 tlai khan a minna ngaiah bawk lei hi minin, kawngpui a hnawh leh nghal a, hemi zan dar 12.30 ah a min belh a ni. Hei vang hian a chhak lama awm, chenna in pahniha chhungkaw 5 chu an inthiarchhuak leh a ni.
Tun tuma lei min hian a chhaka, Vaivakawn – Zohnuai kawng ti khi pha in, Zohnuai – Chawlhhmun panna pawh hi khar lailawk a ni. Lengpui/Sairang lama kal tumte tan chuan Sakawrtuichhun lama kal a ngai a ni.
Helai lei che avanga inthiarchhuak te hi chhungte belh tur nei lo chu BSUP Rangvamualah dah an ni tih thu dawn a ni.
-- Advertisement --
awnga leivung tla hi paihfai zawh hmaa lirthei tlan dan tur ruahmanna siam thar chu:
# Aizawl to Sairang NH54-a 407 truck leh HMV chin, Sairang lam pan tur chu World Bank Road Falkland-ah an awm rih anga; Sairang lam atanga 407 truck leh HMV lirthei chho te chu Ch. Saprawnga Truck Terminal-ah an in park ang. Kawng hi kaltlang theiha siam a nih ve leh Aizawl lama lirthei lian (HMV) tangkhangte kal hmasak tir an ni ang.
# Aizawl to Sakawrtuichhun kawnga LMV tlan dan tur – Aizawl atanga Sairang lam kal tur leh Sairang atanga Aizawl pan turte chu Sakawrtuichhun kawngah kalin, Lungverhah an chhuak thla ang. Sairang atanga lo chho pawh Lungverh kaltlangin Sakawrtuichhun lamah an kal thei ang.
# RK Road lirthei tlan dan tur leh no entry – Zohnuai peng atanga Ropaiabawk kawngah lirthei eng chi mah kal phal a ni lo; Ropaiabawk atangin Zohnuai kaltlangin Vaivakawn a kaltlang theih loh; Rangvamual lam atanga two wheeler kalte chu RK Road-ah chhoin Ropaiabawk lamah an kal thei ang. Ropaiabawk atangin chhuk zawngin RK Road-ah bawk an kal thei ang.
# Vaivakawn to Mizoram University (MZU) – Vaivakawn leh Chhangurkawn inkara lei khi a awm avangin bus/HMV te Vaivakawn atanga MZU via FCI kudam leh Sakawrtuichhun City Bus service-te chu inzui duah duah loin, a inhlat thei ang bera tlan tur a ni.