Raltlan tana sum thawh thei MLA leh sawrkar hnathawkah dap dawn

Manipur buai avanga Mizorama raltlante chhawmdawlna tur sum thawh thei MLA leh sawrkar hnathawk zingah dap tum a ni.
Manipur ram buai avanga Mizorama raltlante chhawmdawl dan tur buaipui tura sawrkarin a ruat ‘Executive Committee on Internally Displaced Persons (IDPs) of Manipur’ chu an chairman, Home secretary H Lalengmawia hoin Thawhlehni khan an thukhawm a.
June 5-a Manipur atanga Mizorama raltlante chhawmdawl dan tur ngaihtuahtu sang ‘High Level Committee’ thurel bawhzui tawh dan an sawi ho bakah hmalak zel dan turah an an inrawnkhawm.
Relief Camp awmna district – Aizawl, Kolasib leh Saituala bawrhsap-te leh Central YMA hruaituten raltlante chhawmdawlna kawnga hma an lak dan leh harsatna an tawhte sawi niin, a sutkian dan tur sawi ho a ni. Fur khua a intan tawh nen raltlante tawmhulna tur – temporary shelter sak chawp hman ai chuan sawrkar hmunhma remchang luah tur zawn tha an ti a ni.
Raltlante chhawmdawlna tur sum leh pai a theih ang anga dap dan ngaihtuah nise, an ti a. MLA zingah leh sawrkar hnathawk zingah raltlante tana sum leh pai thawh thei an awm chuan hma lak nise an ti. School Education department report-ah raltlan zirlai 1500 chuang Mizorama sawrkar sikul hrang hrangah admit an ni a, raltlan zirlai admission ti duh ten document an neih loh pawhin an dinhmun hriatthiam sakin ngaihnathiamna an nei tih sawi a ni. Higher education zirlaite chungchang pawh hma lak mek a nih thu sawi a ni bawk.
Damlo leh natna khirh tuarte enkawl dan tur ruahman a tul tih sawi a ni a. Health department official-ten raltlante hriselna dinhmun an vil dan leh damlo an buaipui dan report an pe a; ICDS nen tang tlanga raltlan naupangte eitur tha an pek thin thu sawi a ni.Raltlante chhinchhiahna mumal leh fel tak siam tura HLC thutlukna awm tawh sa bawhzui zel dan tur sawi ho a ni a. Home department leh ICT department tangdunin hma an lak mek tih sawi a ni. Raltlante buaipui tur District leh Village Level Committee siam tura HLC-in a tih tawh bawhzuiin, inkaihhruaina dan leh a ruangam mumal tak nen Home department-in a ruahman mek tih sawi a ni.
Home secretary chuan chief minister Pu Zoramthanga’n raltlan (internally displaced persons) tanpuina Prime minister leh Union Home minister hnena a dil bawhzui tura New Delhi-a an zin chungchang a report a. Minister Pu Robert Romawia Royte hoa sawrkar laipui hotute an dawr kual hnu ah, hlawhtlin beiseina sang tak an neih thu te a sawi bawk.