Sawrkar karin badge dum bel tan

Centrally sponsored scheme hnuaia Mizoram sawrkara thawkten an dinhmun siamthat an ngenna chuan ngaihsak a hlawh lo nia hriain ni thum chhung an hnathawhna hmunah badge dum belin lungawilohna an lantir tan.
All Mizoram CSS Employee Coordination Committee (AMCSECC) thuchhuak chuan Mizoram sawrkar hnuaia CSS hnathawkte dinhmun hniam lutuk chawikanna’n state sawrkar dawrin lungawilohna tum engemawzat an lo lantir tawh a. 2021 August 16-ah sawrkarin ‘Study Group on CSS’ a din sak a. Study Group hian an hamthatna tur hrang hrang – seniority based-a a tahtawla dahngheh (regularised/absorbtion), an tana recruitment rules siam, medical reimbursement an neih ve theih dan tur siamsak, transfer TA/DA siamsak leh rawtna dangte siam a ni tih a sawi.
Study Group hian kum hnih dawn a zirchian hnuin, recommendation siamin sawrkarah a thehlut tawh a, tun thlenga tih hlawhtlin a la ni lo tih sawiin, sawrkar official-te tum tam tak an dawr tawh bakah DP&AR changtu deputy chief minister hnenah cabinet meeting-a pawmsak turin representation thehlutin ngenna an thlen a; chief minister pawh sawipui tumin kumin May 6 khan appointment dilin tun thlengin an la hmu thei lo tih an sawi.
Kumin June 1-a AMCSECC thutkhawm chuan June 15 thlenga Study Group rawtna hlawhtlinna an hmu lo a nih chuan, kal zel dan tur ngaihtuah an tum tih an lo sawi tawh a. June 15 thlenga sawrkar atanga chanchin an dawn loh avangin June 16 khan, ni thum chhung (June 20-22) lungawilohna lantirna’n department hrang hranga an hnathawhna hmun theuhah “badge dum bel nise” tiin an rel a. June 20 thlenga sawrkar atanga thu an dawn loh avangin Mizorama CSS hnuaia thawk zawng zawngten badge dum an bel ta tih an sawi.
He hmalakna hi CSS hnuaia thawkten an zawm tha hle a. Hemi hun chhunga sawrkar atanga thu lawmawm engmah an dawn loh chuan June 22 hian kalzel dan tur an rel leh dawn tih an sawi bawk.
Sawrkar laipui atanga CSS fund lokal a hun taka state nodal agency-a pekchhuah thin a nih loh avangin hmasawnna hna thawhna tur sum leh hlawh a hun takah CSS employee-ten an la thei lo thin tih pawh sawiin, central guidelines angin ni 21 hma ngeiin a dawng tur nodal agency-a pek chhuah an phut tel tih an sawi a ni.