Lawngtlai district Parva-a awm Assam Rifles ho chu an khaw VCP chunga an chet danah an khua hmuhsitah ngaiin, Vathuampuia tlawmngai pawlte chuan AR hotu ber chu suspend an phut a. Hetiang hi an khuaah thleng tawh lo se an duh tih an sawi.
Vathuampui Joint NGO (YMA, YLA, MHIP leh LWA) thuchhuah intawm tarlan danin, kumin June 17 tlai dar 4.00 vel khan Parva-a awm Assam Rifles commander Major Harsimrap Singh hote chuan Bangladesh raltlan chungchangah Vathuampui VCP C Lalvuanthanga an hmu a, June 19-a raltlan lut tharte chu video cover sak turin VCP hi an ngen leh a, an ngen angin video-in a lo cover a ni. Assam Rifles hi an tih tur an tih zawh hnuah haw ve mai tura ngaih an nih laiin, video lak chu titha leh turin VCP hi an ngen a, hei hi VCP chuan duh loin, tawngkam mawi lo leh hmusit takin amah an tawngkhum zui a, man tumin a phone an laksak a, VCP hian theihtawp chhuah ve in phone chu a chhuh let sak nia sawi a ni.
He thil thleng chungchangah hian Vathuampui Joint NGO chuan thutkhawm hmanhmawh koin Assam Rifles an dem thu an sawi a. An VCP chu dik lo taka man an tum Assam Rifles chu an dem a, a mawhphurtu Major Harsimrap Singh chu thuneituten a rang thei ang bera suspend turin an ngen. He thil thleng hi VCP hmuhsitna mai niloin Vathuampui khua hmuhsitnaah an ngai a, tun hnu ah Assam Rifles-in hetiang thil hi ti nawn tawh lo se an duh, tiin resolution an passi.
He thil thlengah hian Lawngtlaia Assam Rifles hotu, Lt Col. Raju Mondal chuan Nilaini khan Central Young Lai Association general secretary Joseph Lalhmingthanga Chinzah chu thil awmdan sawipuiin, Headquarters atanga thupek an dawn angin India ram chhunga raltan zalen lutuka lut leh chhuak chu enfiah tura tih an ni a, India khua leh tui Lawngtlai distric mipui thawhpui tura awm an ni a, Central YLA leh district mipui nen thawhhona tha tak neih chu an duh ber a ni tih a sawi.
Vathuampui Joint NGO thuchhuah chungchangah engemaw tawngkam inhriatthiam loh leh inman loh vanga hetiang boruak hi awm nia a ngaih thu Lt Col. Raju Mondal hian sawiin, thuchhuaha tarlan Harsimrat Singh phei chu a hmunah hian a awm lo hrim hrim a, Parva station a chhuahsan lo niin a sawi. Hetiang thil thleng theiah nidangah chuan an fimkhur lehzual tur thu sawi bawk.
Central YLA hruaitu chuan Assam Rifles chu mipuiin an thawhpui that zia sawiin, nidang zelah fimkhur lehzuala mipui thawhpui leh thlawp tlaka an hna thawk turin a chah a ni.
VCP chunga chetdanah AR dem
Get real time updates directly on you device, subscribe now.