Raltlante chhawmdawlna tur sum nawrin Home leh Finance lam hmu

Raltlante chhawmdawlna tur sum
nawrin Home leh Finance lam hmu
Manipur buai avanga sahimna zawnga Mizorama tlanlutte chhawmdawlna tur sawrkar laipuiah nawrin minister Robert Romawia Royte chuan Home leh Finance ministry hotute a dawr.
Union Finance secretary Dr TV Somanathan kawmin Manipur buaina vanga Mizorama raltlante dinhmun leh mamawh a sawipui a. Nodal ministry Home secretary Ajay Kumar Bhalla leh additional secretary pahnihte sawipui bawkin, Home ministry-in state ramri kana raltlante enkawlna turin scheme hranpa a neih loh avangin Finance ministry chu Home ministry hnenah ngaihnathiamna pe thuai turin a ngen. Union Finance secretary chuan Mizorama raltlante puihna tur sum pek phalna chu Home ministry-in a rawt angin pek nghal a nih tur thu a lo hrilh a. Minister hian Union Home secretary hi telephone-a bia in Finance secretary thuchah chu a hrilh nghal.
Union Finance secretary hian chief minister Zoramthanga’n Union Finance minister Nirmala Sitharaman hnena a rawt angin SASCI Part-I 2023- 2024 atangin additional, cheng nuai 20000 Finance ministry-in Mizoram a pek belh tur thu minister hi a lo hrilh a. SASCI sum chu release rang tura ngenin, Union Finance secretary chuan hun reiloteah release a nih tur thu a sawi a ni.
Minister hian Niti Ayog hotute kawmin Mizorama Aspirational District Mamit tihhmasawn dan tur a sawipui. Union Sports secretary Sujata Chaturvedi pawh kawmin Mizoram tana project, SAI-in a recommend tawhte sanction rang turin a ngen a; SAI leh Khelo India Centre thar tur rawtbelhna a thlen.
DC&MA minister Robert Romawia Royte hian Minority Affairs ministry hotute kawmin Mizoramin PMJVK scheme a kalpui that thu a sawi a. A hmunah an hnathawh endik turin a sawm. Sum pekchhuah tur awm ang angte pe chhuak thuai turin a ngen bawk.
Minister hi amah tawiawmtu MLA pahnih Dr K Pachhunga leh Er H Lalzirliana te nen Union minister Kiren Rijijju chu Manipur buai chungchang an sawipui a. Sawrkar laipuiin raltlante tanpuina a pe mai lo chu pawi an tih thu hrilhin, Manipur buainaah Prime minister chu inrawlh thuai tura an duh thu an hrilh. Hmarchhak tana Union minister a nih angin tan la turin an ngen a ni.