Raltlante kirtir thei lo

Bangladesh-a Zo hnahthlak, Mizorama tlanchhiate hi BSF te’n kirtir han tum thin mah se an kirtir thei tak tak lo a ni ang, an kirtir emaw an tihte kha an rawn lang leh thin.
July ni 4 khan Damdep II-ah raltlan za chuang an lut a, BSF te’n kirtir an lo tum nghal. July ni 6-ah khan an kirtir vek nia hriat a ni a, mahse ni 7 zanah BSF kut atangin Mizoram Police te’n an la. Ni 8-ah Chamdur P hruai thlen an ni. Heng mite hi BSF te’n a hmaa an kirtir tawhte vek an lo ni!
Tun hnaiah BSF te’n a hlawmin raltlante hi an kirtir a, June ni 15-ah leh July ni 4-ah mi engemaw zat an kirtir. July ni 4-a Damdep II-a lut, ni 8-a Chamdur P hruai thlente hi June ni 15 leh July ni 4-a BSF te’n an kirtirte vek kha an ni.
Thu dawn danin, BSF kirtirte ramhnuaiah an biru a, Bangladesh-a let lehte pawh mahni khuaah an awm ngam lo; khuaa an awm chuan Bangladesh sipaite’n an man ang tih an hlau a, chuvang chuan ramhnuaiah an biru. Mizoram lam ramhnuaia biru chu an awm bawk. Chutianga biru chung chuan an tlanchhia a, an zinga mi engemaw zat chuan Damdep II, chuta tangin Chamdur P an thleng ta a ni.
Chamdur P atanga thu dawn danin, raltlan lut tharte hi mi 126 an ni a, pitar leh putar an awm bakah naupang leh naute pawh an awm. Raipuar pawh hriat theih chinah pahnih an awm.
A tam zawk chu June ni 15-a kirtirte kha an ni a, a dang zawng chu July ni 4-a kirtir an ni. Ramhnuaia biru, chaw ei mumal lo, zan mu mumal lo an ni a, an chau hle tih thu dawn a ni.
“A then phei chu thla khat dawn biru tawhte an ni a, an chau lutuk hi an khawngaihthlak. Ding rei thei lo an awm a, zawn ngai an awm a, puak ngai an awm a. An ke a vung ber bur a, an kut leh kete a pan a, khawngaihthlak tak an ni,” Chamdur P-a tlawmngai pawl hruaitu pakhat chuan a ti.
An bihruk chhung hian eitur an hmuh ang ang an ei tih an sawi a, changel, tumbu leh maipawl helte an ei a, chul an hmuh fuh chuan thlai rah ei tur an nei thei a, thlamah mi buhfai dah hmuh fuh chang an nei bawk tih te an sawi.
Chamdur P hi zing dar 3 velah an thleng a, khawtlangin chaw ei lo siam. Mahse chaw ei peih lo, mut thlang zawkte pawh an awm tih thu dawn a ni.
BSF te kirtir tawh mi dang pawh rawn lang leh turah ngaih an ni a, mahni khuaa awm ngam lo, biru kual mek an awm nual bakah la tlanchhe lote pawh tlan chhuak thei dinhmuna ding an ni tih thu dawn a ni.