Raltlante pang a dam lo

Bangladesh-a Chittagong Hill Tracts atanga Parva III khuaa lut raltlante an dam lo a, tunlaiin an khua a sik sup sup a ni awm e.
“Tunlai chu an khua a sik sup sup mai. Chhungkaw khatah mi pahnih pathum te an dam lo a, an khawngaihthlak khawp mai,” Parva III khuaa an YMA hruaitu pakhat chuan a ti.
A khaw mi-ah khawsik an awm ve tho a, mahse an tam lo tih a sawi a, “Fur lai te a lo ni a, keini a khaw mi-ah pawh khawsik chu an awm ve tho a, mahse kan tam lo. Kan raltlan unauteah hian a nasa a,” a ti.
Dam lote hi doctor te’n an en tih a sawi a, thuneitu lamin doctor rual an tir a, anni’n enin damdawi te an chawh tih a sawi.
Raltlante hi ei chhiat vanga dam lo an nih an rin thu an sawi a, an YMA hruaitu pakhat chuan an khua atanga Mizorama lut tura an kal kawngah hrehawm takin, chaw ei mumal lovin an kal a, an thang rei bawk si a, chu chu a lo lang a nih an rin thu a sawi.
“Kein an rawn kal a, kawng pangngaiah an kal ngam lo a, kawng pawh awm lovah an kal a, an thang rei a. Chaw an ei mumal lo a, changel te an ring a, rei deuh deuh changel leh tuisik ring te an ni a, chumi nghawng chu a ni ang,” a ti.
Chittagong Hill Tracts atanga Mizorama tlanchhiate hi a theih ang angin an inhlawh a, sorkar atangin buhfai dawngin tanpuina dang te pawh pawl leh mi thahnemngaite atangin dawng mah se chhungkuaa awm te an nih avangin inhlawhna tur an dap chawp a ngai. Parva III bikah hi chuan hlo thlo tein an inhlawh a, in saknaah te an inhlawh thin. Ni khatah Rs 350 te an hlawh. In 46 vel khua an ni a, inhlawhna tur hi a tam thei lo. A then chu khaw dangah inhlawh turin an kal.
Parva III-a raltlan tleirawl pakhat, Zinungkimi, kum 15 mi pawh inhlawh turin Thenzawlah a kal a, mahse a dam loh tak avangin ZMC-ah enkawl mek a ni. Malaria leh dengue a lo vei a, ZMC-ah hian ICU-ah an enkawl mek tih thu dawn a ni.