Ram dinhmun: Hruaitute azir zel….

Congress lal hun laia finance minister lar tak ni thin P. Chidambaram-a’n tuna BJP sorkarin Rs 2000 currency note tihtawp a tum chu lawmawm a tih thu a sawi a.
Kum 2016 khan sawrkar chuan black money tihtawp nan demonetisation (500 leh 1000 note) a kalpui a. Khatih rual khan opposition lam sawiselna karah Rs 2000 note a tichhuak ve nghal bawk a. Hun a lo kal zel a, Rs 2000 note tihtawp tulna a lo lang chiang leh ta a.
Ram hnuk khawih thilah hi chuan ram leh hnam tana tha tur leh tha lo tur hi ngunthluk taka ram hruaitute hian political party dinhmun dahthaa dawhkan khat kil hoa an ngaihtuah theih leh an ngaihtuah thiam hi a pawimawh hle a. Opposition ngaihdan a nih vang hrim hrima ruling lamin a dik a dawk pawh thlu lova hnualsuat ringawt hi ramin a tuar thei a, chutih rualin party nihna dahthaa ram leh hnam dinhmun chauh tinzawn chunga rorelna hi ramin a dinchhuahpui thei bawk a ni.
Khawvelin India ram a zahna leh a dah ropuina pakhat chu nuclear test kha a ni, a tih theih awm e. Nuclear test (vawihnihna) theia India a awm lai leh general election kha a innangching a. Congress hun lai a ni a, prime minister PV Narasimha Rao khan inthlan zawha an sawrkar leh chuan nuclear test kha kalpui ngei ngei a tum a. Mahse, a tling zo ta lo va, BJP an chak a, chuti chung chuan Narasimha Rao khan prime minister thar AB Vajpayee kha nuclear test chungchang a sawipui ta tho a. AB Vajpayee khan sawrkar hmasa ruahmanna a nih vang hrim hrima tihhlawhtlin duh lohna rilru puin, India ramin a ropui phah leh a that phahna tur tih hre reng chungin PM hlui ngenna kha tihlawhtling duh lovin nuclear test vawihnihna (May,1998) kha kalpui duh lo ta se, India hian khawvel lakah tun dinhmun hi a thleng pha kher awm lo ve.
Ram dinhmun hi hruaitute azir zel a ni tih chu India ram state thenkhat dinhmun inlet thawk thawk thin atang pawh hian a lang chiang hle a. Hemi kawngah hian Mizoram chuan zirtur kan la ngah em em a ni tih hi a lang chiang hle bawk.