A GUIDE TO SMART FARMING – 20

RK Dawla
Mb 9366095658
1. May thla tâwp lam kan lo thleng tan dêr mai a. Kumina ruahtui kan dawn chhunte (Mizoram chhung hmun tam zawkah) a uchuak lo tlangpui hlauh nâ a, kan dawng chhangkhât ang reng viau a. Hei hian rannung a tipung zual fo thin. Kan inchhung leh veranda light rawn bâwm thin rannung tam dan atang chauh pawhin, kan huan leh thlawhhmaa rannung puan hun leh tam dan tur chu a hriatthiam theih âwm e. Rannungte hi chi hrang tam tak Pathianin a siam a. thenkhat thlai eichhetu, thenkhat erawh thlai tâna tangkai! A thenin thlai an ei chhia a, a thenin thlai thi ruang an chipsawm a, a thenin thlai eichhetu rannungte an ei ve lehchhawng bawk.
2. Rannung vanga harsatna kan tawrh nasat fo chhan pakhat chu thlai chi 2/1 chauh chin (monoculture) hi a ni. Bit tak leh a mual muala thlai chi khat chauh chingin, thilto dang lo awm ve tur hnimte theihtawpin kan suat kumtluan bawk si a. Kan thlai chin ei duhtu rannung tân rawn pan chhan kha a awm dawn êm mai a. Kan thlai eichhetu rannungte hi kan buaipui tak tak dawn a, kan zir dawn a nih chuan, anmahni angah va inchan kha a tul ve fo thin. Khaw tha tak hnuaiah kan chaw duhzawng tak, bit taka lo awm tuarh kha chu kan bàwr lui lui ang chu mawle, keini pawhin…
3. Rannung chungchangah hian kan rilru put dan a dik tâwk lo fo thin a. Kan thlai eichhetu rannung rawn inlârte hi rang taka tûr chak tak hmanga kah hlum miah miah mai kha kan tinzawn fo thin. Hei hi a dik tâwk lo êm êm. Rannung thahna damdawite hi loh theih lohva hman chauh tura siam an ni a, mihring eitur-a lût tura siam an ni lo bur bawk. Kan thlaite kan kah khan loh theih lohvin engemaw chen kan ei tel lo thei lova. Tin, kan thlai eitu rannung ei lehchhawngtu rannung dang (predator)-te khan, damdawia kah rannung an ei khan an thihpui bawk a. Tichuan, damdawi hnathawh tâwpah an rawn puang leh tho tho thin.
4. Pathian thil rêl danah hian, eitu aiin eitur hi an pung chak a, an tam zawk ngial thin bawk. Rannung hnawksak eitu rannung dangte hi an pung mawhin, an eitur rannungte ngawt ai chuan an bial pawh a zau deuh thin a. Thlai eitu rannung kan suat ruala rannung eitu (predator) 10 lek kan suat tel pawh kha a pawi pha dawn ta tlat a. Kan huan pumpuia thlai zawng zawng insecticide-a kan han kâp mai hi chu, predators engzat tak hi suat tel ang mawt Pest management kan tih awmzia ber hi chu – Natural predators-te kawng engemawtiin kan thawhpui tihna a ni a. Predator suat tel chiam chiam hi pest management a ni tawh lova, mass destruction of ecosystem component zawk a ni. Season tinin pung chak tak pest an kiam phah tak tak lo, pung chak ve lo predators an rêm chak hle dawn tih chiah a hriatthiam theih.
5. Mihringte hian mahni hma kan sial lutuk a. Kan duh ang anga nature hi control kan tum a. Pathianin ecosystem nghet tak a duansa ramhnuai kan vât a, kan duhdanin ecosystem thar din kan tum a. Mahsela, Siamtu Pathian lo duansa dan zawk khan a tâwpah ro a rel leh tho tho thin. Engvangin nge rannungin thlai an ei rêm fot Engvangin nge tâm leh pûl hri kan tawrht A chhan chu leilung kan enkawl leh thlai kan va dah luh dan kha khuarel nen a inrem lova. Khuarel/Nature chuan kan thlai awmsate mil leilung a awm lova, a mil tâwk thilto dang rawn chhuah a tum tihna zawk a ni. Chumi atân chuan kan thlai va dahluhte kha Nature chuan hnâwl tul a ti tihna! Hun a lokal zel ang a, Open air cultivation-ah hi chuan Nature hlutzia leh chungchuan zawkzia kan la hmu chho telh telh ang.