Ram leh hnam humhalhah mahni kan inthlirkan – CYMA vice president

Ram leh hnam humhalhah mahni kan
inthlirkan – CYMA vice president
Ram leh hnam humhalh kan sawiin mahni kan inthlirkan daih zel tih Central YMA vice president Lalhmachhuana chuan a sawi.
YMA Maubawk Branch-in YMA kumpuan ‘Ram leh Hnam Humhalh’ hawnna April 28 zana an hman a hmanpuinaah Lalhmachhuana chuan chhiatni bikah la intawiawm tha hle mah ila, tunlaiah chuan YMA anga inkohkhawm leh thil tihkhawm a harsa tan ta hle tih a sawi a. Inkohkhawm a har tawh danah vei loh tur zawk kan vei tawh ni tea a lan thu a sawi.
“Ram leh hnam humhalh kan tih hian kan thlir zau lutuk thin a. Ramri chungchangte, kan tualchhunga ruihhlo hluarte, khawtlang nuna kan fel tawk lohnate kan thlir thin a, keimahni kan inthlir kan daih zel a ni,” a ti.
Mizoram ramri km.772 pawnlama awmte chu damkhawchhuah khel tak tak vek an nih thu leh an zingah hian kan chipuite pawh an awm thu te, India ram khua leh tui nih khel ngar ngar an awm thu te sawiin, “Min hual veltute hi survival khel vek an ni a, an ni chuan hnathawh nachang an hria a, keini a ramchhung mite zawk hi kan awm mai mai a. Hna kan thawh ve chhun lahin tawrhchhelna kan tlachham a, an ni chuan chhel takin hna an thawk a ni. Hetiang renga kan kal chuan min la luahlan thei tih kan hriat a tha hle,” Central YMA vice president hian a ti.
Nun lem nei kan tam thu sawiin, “A dik em tih pawh ngaihtuah hman loin hlawk kan tum a, hei hi chiahpuam khan a tilang chiang hle. Hlawkna kan duh avangin a dik leh dik loh kan ngaihtuah hman loa, hlawkna kan duh avangin midangin tuar mah se pawi kan ti tawh lo. Hei hian kan khawtlang nunhona a tichhia a, thlantlaa hnathawh ai chuan dik vak loa sum lakluh kan duh tawh zawk a, hei hi siamtha tur chuan ram leh hnam humhalh kan tih hian a huam tel vek a ni,” a ti bawk.
Hnathawh thawmhnaw haa thlan tlaa hlawh hmuh ai a, smart taka mi bum ching kan ngaihsan zawkna pawh sim a hun tawh hle tih Central YMA hruaitu hian a sawi a. Mizote chu hman thuawih leh hruai nuam kan ni, tiin, “System tha a awm chuan kan zui hreh loa, system tha kan duan thiam a ngai a ni,” a ti.