Ram leilung humhalhna’n dan kan kengkawh thin – EF&CC minister

Ram leilung humhalhna’n dan kan
kengkawh thin – EF&CC minister
Ram leilung humhalhna atan an department chuan dan hrang hrang an kengkawh thin tih Environment Forest & Climate Change minister TJ Lalnuntluanga chuan a sawi.
EF&CC minister hian Thawhtanni khan Conservator of Forest, Northern Circle office leh quarters, Project Veng Kolasibah a hawng a. Hemi rual hian Extension of Forest Rest House Bairabi a hawng nghal.
Ram leilung humhalhna atan EF&CC department chuan dan hrang hrang a kenkawh thin thu a sawi a. Dan bawhchhiate chunga hremna lekkawh a ngaih thin thu leh dan hnuaia phalna neite, zawm tur ang tha taka zawmte tan harsatna a awm ngai loh thu a sawi a. Chhuan lo la awm leh zel turte tan ram leilung hausakna humhalh chu mitin mawhphurhna a ni tih a sawi bawk.
Mizorama Forest Division 5-ah Green India Mission kalpui mek a nih thu minister hian a sawi a. Forest Division zawng zawnga kalpui a nih theihna’n hma lak mek a nih thu te, hemi hnuaiah hian huan nghet nei tura thei huan siamtute tanpuina tur ruahmanna a awm thu te a sawi a ni.
1984 July khan Mizorama Forest Division awm zawng zawng chu Directorate hnuaia dah an ni a. 1984 July 13 khan Conservator of Forest (Northern Circle) hi siam niin, a thuthmun atan Aizawl ruat a ni. Chumi rual chuan Director of Forest post chu CF (Southern Circle) post-a siamrem niin, a thuthmunah Lunglei ruat a ni. CF (Northern Circle) office chu 1985 November 19 khan Aizawlah kalpui tanin, December 13-ah CF (Southern Circle) office pawh Lungleiah kalpui ve nghal a ni.
CF (Northern Circle) hnuaiah hian Division paruk – Aizawl, Champhai, Mamit, Kawrthah, Kolasib leh Darlawn Forest Division-te a awm thin a. Kum 1991-a Division hawn thar, Thenzawl Forest Division pawh a tel nghal a ni. 2003 July 3 khan CF (Central Circle) chu CF (Northern Circle) atanga indangin Kolasib, Darlawn leh Kawrthah te a bial a; 2010 August 13 khan Central Circle hnuaia awm Mamit Division chu Northern Circle hnuaia behtir a ni.
2014 November 10 khan CF (Northern Circle) Hqrs chu Aizawl atanga Kolasiba sawn phalna chhuah niin, hma lak nghal a ni a. He hmalakna avang hian cheng nuai 30 sengin CF Northern Circle office sak a nih bakah cheng nuai 20 sengin CF quarters leh nuai 20 tho sengin Conference Hall siam a ni.