Ram pum huap intawhkhawm Conclave panelist-ah Zopa

Ram pum huap intawhkhawm
Conclave panelist-ah Zopa
Mann ki Baat episode 100-na urlawknaa National Conclave panelist zingah Mizopa Rochamliana a tel.
Prime minister Narendra Modi-a’n radio kaltlanga rampum huapa thu pawimawh hrang hrang a sawi thinna programme, Mann ki Baat episode 100-na chu April 30 hian AIR atanga tihchhuah a ni dawn a. Chumi hun bik lo thleng tur urlawkna chu tunkar chhungin New Delhi-ah hman mek a ni. Hemi puala buatsaih National Conclave on Mann ki Baat@100 chu Ningani khan Vigyan Bhawan-ah Vice President Jagdeep Dhankhar chuan a hawng a, Information & Broadcasting leh Youth Affairs minister Anurag Singh Thakur leh I&B minister of state Dr L. Murugan ten Vice President hi an tawiawm. Conclave kharna inkhawmah Home minister Amit Shah chu khuallian a ni a, Railways minister Ashwini Vaishnaw, I&B minister Anurag Singh Thakur leh Finance minister of state Pankaj Chaudhary ten an tawiawm a ni.
Conclave ah hian thusawitu (panelist) zingah filmstar Aamir Khan, IPS officer hlui Kiran Bedi, Jamia Millia Islamia University vice chancellor Prof. Najma Akhtar, filmstar Raveena Tandon te an tel a. Panelist zingah hian Save Chite Lui Coordination Committee general secretary Rochamliana pawh a tel.
April 30 hian India ram puma state tin Raj Bhavan leh UT-a Raj Niwas zawng zawngah Mann ki Baat episode 100-na pual hian hun hmang vek tura ruahman a ni.