Ram pum huapin pipu sulhnu leh kut ziak hlui vawnthat beihpui thlak dawn
District Level Committee on Gyan Bharatam Mission Serchhip chu an chairman, bawrhsap Paul L Khuma hoin Nilaini khan an thukhawm a. Sawrkar laipui Ministry of Culture kaltlanga India ram pum huapa kutziak (manuscript) hlui zawn chhuah leh vawnthat (digitalized) kawnga hmalakna kal mek sawiho niin, Serchhip district-a hmalak dan tur sawi a ni.
Art & Culture Department atangin Gyan Bharatam Mission thil tum sawizau a ni a. Pi leh pute sulhnu, an kutziak (khawlchhut ni lo) hrang hrang a riral mai loh a, vawnthat a nih theihna tura hmalakna a ni. Manuscript ni tur chuan kum 75-a upa, kutziak ngeia thuziak a ni tur a ni a, hnah thel, lehkhapuan siam chawp, puan, thing emaw thira ziah a ni tur a ni. Gyan Bharatam Mission-in a tum ber chu, manuscript-te humhalh a, a neitute remtihnain tunlai thiamna hmanga vawnthat (digitize) a ni.
Tunah hian ‘zawn chhuah’ (identification) hna thawh mek a ni a, awlsam zawka he hna thawhna atan hian ‘Gyan Bharatam mobile application’ siam niin, mi tu pawh, mimal leh pawl emaw, thu ziak hlui report tur nei chuan he mobile application kaltlang hian an thehlut thei. Mipuiin he application hi an hmelhriat tlan deuh deuh a pawimawh tih sawi niin, heng manuscript hi a neitute remtihna thlapin uluk taka thla lak a, a soft copy chauh vawnhim tura lak a ni anga, a tak (original) chu a neitute kutah a awm zui zel dawn a ni.
Tun dinhmunah Mizoram chuan mobile application kaltlang hian survey request – 2, manuscript – 28 a nei mek a; hmarchhak state-ah manuscript report la nei tlem ber a ni.
Thutkhawmah hian Serchhip khaw chanchin hria leh thu leh hla lama mi ril, Lalhmangaiha Chawngthu bakah Govt. Serchhip College atangin assistant professor pahnih – K Lalrinchhana leh Laldinpuia te an tel bawk.
Gyan Bharatam Mission hi kum 2025 – 2031 inkara kalpui tur a ni a. Mizoram-ah State Level Committee leh District Level Committee chu kumin April 1 khan din tawhin, Art & Culture Department chu state nodal department a ni. Tunah hian district tinah awareness campaign neiin an feh chhuak mek.
Nilaini vek khan hetiang thutkhawm hi district dang – Saitual, Hnahthial leh Mamitah pawh neih a ni a, an district-a bawhzui dan tur an rel a ni.