Ram tana hna thawh tumin mi thaten Congress an pan mek – MPCC treasurer

Sawrkar tha siam tum Mizoram mamawh mi tha tak takin Congress party an pan khawm mek tih MPCC treasurer Dr Lalmalsawma Nghaka chuan a sawi.
Thawhtannia Congress Thalai Hqrs. hruaitu kalchhuak tur leh tharte chanvo inhlannaah Congress Thalai president kalchhuak tur Dr Lalmalsawma chuan Mizoram thalaite sawrkar tha duhin an tuihal a. Kan chhehvela kan unaute pawh thlamuan ngaiin an rum mek tih sawiin, “Hengte tan hian sawrkar tha pe turin Mizoram mipuiin Congress party-ah beiseina an nei sang ber. Chu’ng an beiseina hlenchhuak turin MPCC president Pu Lalsawta an au a, a hoa sawrkar tha siam tum Mizoram mamawh mi tha tak takin Congress party-ah hna thawh tumin an rawn pan mek a. An ni nen ram hmasawnna hna thawkin sawrkar tha kan siam dawn a ni,” a ti.
Ram tana thawk tura kalkawng pawimawh chu thalaia kan chanvo tha taka hlenchhuah a ni, tiin, chanvo chu khelh chhuah tur a ni loa, a thawha thawhchhuah tur a ni a. Chhawr leh rintlak ni si lo, nihna chelh duh thinten pawl kalphung an tibuai foa, hmasawnna daltu an ni thin, tih a sawi.
Congress Thalai president thar Laltawnliana Sailo chuan Congress party-in thalaiten an thiamna leh tuina ngeia eizawnna an neih theihna’n Mizoram Kailawn kalpuiin thalai tam takin eizawnna anmahni pualin an thiamna leh tuinaah ngei an neih phah tih a sawi a. Tunah Mizoramin sum harsatna a tawk a, Mizoram mipui kan buai a, thalai mithiam tam tak eizawnna nei lo leh eizawnna nei pawhin harsatna an tawk leh mek tih a sawi.
Heng harsatna sukiang a, thalaiten an tuina zawn taka ei an zawn leh theihna turin sum leh pai enkawl thiam, mi rinawm leh kutfai Pu Lalsawta Pathianin Mizoram enkawl turin min pe tih a sawi a. Mizoram thalaiten ram hruaitu viak tha leh chak, ngaihtuahna leh hria, mi ram leh state ten an neih ang neih ve chakin kan tuihal a. Congress party chuan thalaite tuihalna chhawk tur leh an khawvel din sak a, buatsaih turin Congress party hruaitu atan, MPCC OB ah thalai viak tha Dr Lalmalsawma a dah sak leh bawk tih a sawi a ni.