Ram tana hnutchhiah neih…

Mizo essayist hmasa Kaphleia khan, “Ka ram hi eng nge ka hnutchhiah ang? Hnahthel ro angin ka tla bo mai dawn em ni?” tiin a inzawt a. “…khawvela thiltih tur pawimawh tak tak a tam tehlul nen, pakhatmah ti lova ka liam tur hian min ti lungngai ber a ni,” a ti bawk.
He thu hi kum 85 vel liam taa a sawi kha a ni a, kan rama Kristianna a lo luh hnua thuziak hmanga ram leh hnam veina lam hawi ziaktu nationalist hmasa ber pawl a ni awm e. Khatih hun lai atang tawha khati tak maia ram veina rilru a lo pu thei tawh kha a ropui hle a, hei hi Mizo thalai, thangtharte hian intuaithar nan hmang thei ila a duhawm hle mai.
Ram inrelbawlna hna thawk tura mahni inpe ‘politician’ kan tihte hian, ‘min thlan tlin chuan kan chuti kan khati ang’ tiin ram leh hnam kaihhruaina hna an thawh dan tur mipui an hrilh thin a. A chang chuan, “Hnathawh kawr min haktir rawh u…” te pawh an ti thin bawk. “Midangin thawk rawh se, kei ai chuan an thawk tha thei zawk ang, kei ai chuan thahnem pawh an ngai zawk ang” ti lova, “Anni ai chuan keini hian kan ti thei zawk ang” tia mahni intawktarh a, ram leh hnam tana inpe politican an ni a; kum hei leh chen hi ram kaihhruai hna an lo thawk ta a, “Ram tan eng nge ka hnutchhiah?” tih hi an inzawh fo a pawimawh khawp ang.
Sawrkar tinte khan hna chu an thawk vek a, hunin a rawn her chhuahpui milin hmasawnna rahbi thar eng eng emaw chu an tuk belh ve zel, hna thawk lova awm mai mai sawrkar a awm theih loh. Chutih laiin, kum tam tak hnu, chhuan lo la awm zel turte tan pawha ram nuam leh chhenfakawm tak an hnutchhiah nge, eng nge? tih hi zawhna pawimawh tak a ni.
Hetiang bawk hian mipui lam pawhin, kan ram leh hnam tan hian engnge kan hnutchhiah? tih hi kan inzawh a pawimawh bawk. Engkim mai sawrkar tihtura dah a, ‘ka ram tan eng nge ka tih theih ve?’ tih inzawt lova, ‘ka ram hian engnge min tihsak theih?’ tih hlir mai zawhna kan siam chuan, ram ropui kan thleng hauh lovang. Ram tana hnutchhiah tur tha kan ngaihtuah vek chuan, chumi infinkhawm chuan ram nuam tak a siam ngei ang.