Ram tana inkhelh bansan tum Brazil great Marta

Brazil legend Marta chuan kumin hi international football a chawlhsan kum a nih ve tawh tur thu a nemmnghet.
Kum 38 mi ni ve tawh Brazilian striker hi Brazil tana international football-a goal khung hnem ber niin, kumin hian France rama Olympic Games football inelna hmachhawn tur Brazil squad-a thlan a nih leh chuan vawiruk ngawt Olympic-ah a inlan tling dawn tihna a ni.
CNN hnenah Marta hian a hmalam boruak sawiin, “Kumin hi national team-a ka kum tawpna ber a nih ve tawh dawn avangin kumin hian Olympic-a ka kal leh a nih chuan kan cham chhung ka enjoy hliah hliah dawn a ni.
“Kum 2025 atang chuan national team-ah athlete nihna angin Marta hmuh tur a awm tawh lo ang,” a ti.
Marta ho hian Athens 2004 leh Beijing 2008-ah Brazil hmeichhe football team chuan final-ah United States an hneh lo ve ve a, Olympic gold nen ngeia chawlh chu a duhthusam a nih ngei a rinawm.
Mipa leh hmeichhia sawi loin Marta hi World Cup-a goal khung hnem ber niin, he tournament vawiruk a hmachhawnah game 23 atangin goal 17 a thun tling a; tah pawh hian champion ni zo loin a chawl dawn a nih hmel a, an ram a champion-pui teuh ber 2007 World Cup final-ah Germany hneh loin Brazil chu runners-up a nihpui.
World Cup-a knockout stage an luh zawh loh hnu khan World Cup-a inlan zui a tum tawh loh thu puangin, tunah international chawlhsan a tum thu hriat tur a awm zui leh ta a ni.
Club football lamah chuan kum 2017 atang khan Orlando Pride tan a la khel zui ta ngar ngar a ni.