Ram Temple hawnnaa tel duh lo vote loh tur ti

“Parliament-ah ngei Congress leader lawk tak tak ten Lok Sabha inthlan hmachhawn ngam lovin Rajya Sabha ah an lut ang ka ti a, ka sawi chu a thleng dik a ni. An inheritance right anga an ngaihte chu bansanin an tlanchhia a ni” tiin Prime Minister Narendra Modi chuan a sawi a. Hei hi All India Congress Committee president Mallikarjun Kharge a sawi chhan nia ngaih a ni bawk.
Kum 2019 Lok Sabha inthlanah khan Kharge chu a constituency chhuahna Kalaburagi ah hnehin a awm a. mahse, a hnuah Rajya Sabha MP ni zuiin Upper House-ah Leader of Opposition a ni mek.
Modi chuan Congress leh an thawhpui te chuan Ram mandir hawnna Ayodhya a neihah pawh an tel duhlo tia sawiin mipuite chu inthlanah pawh hnawl turin a ngen a.
“Ram Mandir Trust member-te chuan Congress leh an thawhpui leader te chu hmu in Pran Pratistha ceremony, Ram Mandir, Ayodhya neiha tel turin an ngen a ni. Mahse, hruaitute chuan sawmna an hnawl hmak a, Lord Ram an hmusit a ni. Ram Temple sak a nih nana kum 500 zet beia nghahna hmuhsitna a ni” tiin a sawi bawk a.
“Thil thianghlima tel tura sawmna hnawltute chu in hnawl ve a ngai a ni. Congress te chuan Ram Mandir sak a nih chuan ram a buai ang an ti a. Temple kan sa a, chutiang buaina chu engmah a thleng lo” tiin Modi chuan a sawi bawk.
Dan pawna hnawl tawh Popular Front of India (PFI) te chu pawl hlauhawm ti bawkin Modi chuan inthlanah chakna chan duh vang hrim hrimin Congress te chuan an thawhpui a ti bawk a.
“PFL te hi pawl hlauhawm an ni a. Pawisawilo mihring an tihhlum kan remti lo a ni. Chuvangin huaisen takin dan pawnah kan hnawl a ni. An hruaitu tam tak te chu lung in ah an tang mek a. Mahse, Congress te chuan ram tihchhiat tumtute an thawhpui si a ni” tiin Modi chuan a sawi bawk.
Article 370 nuaibo Congress ten duh lova an sawiselna pawh sawiselin Modi chuan tunah chuan Article 370 nuaibo avangin Kashmir chuan hmasawnna kawng a zawh tawh a ti bawk a.
“Baba Saheb Ambedkar Constitution chu Kashmir ah hman a ni ve lo va. Constitution dang daih an nei a ni. Kashmir a Dalits te chuan reservation rights an nei ve lo va, Article 370 kan nuaibo khan chung harsatna te chu kan nuaibo vek a ni. Article 370 nuaibo a nih hnuah khawvel hmun hrang hrang atangin khualzin ten Kashmir an tlawh tawh” tiin Modi chuan a sawi bawk.