Ram tiam lam pan Djokovic

Australian Open 2024 khelh mekah Thawhlehni khan champion lai Novak Djokovic chuan quarter-final-ah Taylor Fritz a hneh a, semi-final a lut. Djokovic hian Grand Slam-ah vawi 25 champion tlin a tumna leh Australian Open-ah vawi 11 champion tumin hma lam a pan a. Tiam chin lam panin a kal zel.
Tennis player ropui ber Novak Djokovic hian quarter-final-ah an intum tawh vawi riata a hneh vek Taylor Fritz a hmachhawn a. A hneh than Fritz lakah set khat hloh bawk mah se harsatna lian tawk zui lovin hnehna a chang a, semi-final a lut. A ropuina belhchhah a, Grand Slam-ah vawi 25 champion tling turin vawi khat chak chiah a mamawh tawh.
American 12th seed Taylor Fritz hian fourth round-ah kum 2023 a finalist Stefano Tsitsipas a hma-chhawn a, inkhel hmuhnawm takah hnehna chang nawlhin quarter-final a lut. Greek tlangval Tsitsipas a hneh vangin inrintawkna sang zawk nen champion lai Djokovic lakah bul a tan a, a la hneh ngai loh Djokovic lakah bul a tan chhe hran lo. Set khatnaah game an inlakchhawk zak zak a, tie-break khelh a ngai nghal pang. Tie-break ah boruak sanga chetha thin Djokovic a chungnung a, set hmasa a la.
Set hloh hmasa zawkah tang mah se Fritz a talbuai phah lova, a insiamtha thuai. American 12th seed Fritz hian break pawimawh zet mai a nei a, game li hloh chungin set hnihna a la. Set khat ve ve an lak hnuin champion lai Djokovic-a’n semi-final luh ngei tumin thapui a thawh zui a, a khelh tha zui ta viau. Nole hian game hnih chauh hloha set a lak hnuin set lina tir lamah break a nei zui leh nghal a, khawlum tak hnuaia inkhelah Serb hian 7-6 (7-3) 4-6 6-2 6-3 in hnehna a chang a, semi-final a lut ta a ni.
Champion tura rinkai ber Novak Djokovic hi a final a luhna kawng dal thei ber tura ngaih Jannik hmachhawn thei dinhmunah a ding a. Sinner hian he Rublev a pal tlang zet a ngai dawn thung.