Ram tiam lam pan Djokovic

Melbourne Park-a Australian Open 2023 khelh mek chu nilaini khan quarter-final khelh zawh a ni. Nilai tlai khan Novak Djokovic chuan awlsam taka Andrey Rublev hnehin semi-final a lut a. Semi-final ah Tommy Paul a hmachhawn zui leh dawn. Djokovic hian Grand Slam a Nadal champion zat tluk turin ram tiam lam a pan zel a, Grand Slam ah vawi 22 champion turin vawihnih chiah chak a mamawh tawh.

Hliam in a tihbuai Djokovic hian inkhel a hmachhawn hram hram a, an chak zel bawk si vangin rinhlelh a tawk hial a. Mi lainat hlawh nana a hliam tawrh hmang tangkai ang hiala puh tawk pawh an awm. Quarter-final ah Rublev a hmachhawn tum hian Djokovic hian a malpui a la tuam luk nang a, a chevel a zangkhai telh telh a, dam lam a pan zel tih a hriat theih. Dam tha pangngai taka a inlan vangin Rublev a hmachhawn hi Australian Open 2023-a a khelh that ber tum ang hiala ngaih a ni zui ta nghe nghe a ni.

Rublev lakah 72% zeta chak zawk tura rin Djokovic hian tha chungchuang takin bul a tan a, set khatnaah game khat chiah hlohin set ala nghal pang a. Set khatnaah an chet phungin semi-final lut tur zawk rin thiam a harsa lo nghal viau.

Awlsam taka set a lak hnuin Djokovic hian set hnihnaah bul a tan tha leh viau a, break a nei leh nghal pang. A khingpui a break nawn theih laiin a serve a hum zel thung a. Game hnih chiah hloh chungin set a la nawn leh.
Set hnih a hloh hnuin Rublev hian insiamthat mamawh viau mahse hma a sawn tak tak thei chuang lo. Set thumna ah a serve a hum zo lo leh thuai a, hnufual zawk ni chungin khingpui hautak Djokovic a um. A khingpui break let theihna hun remchang nei bawk mahse Russian star hian a chhawr tangkai zo lo zel a, game li la bawk mahse set a hloh zui leh tho thung. Tichuan, mit la taka inlan Djokovic hian fifth seed Andrey Rublev lakah 6-1, 6-2, 6-4 a hnehna changin a vawi 10 nan Australian Open semi-final a lut.

Rublev laka chak Novak Djokovic hi Melbourne Park ah vawi 26 a chak zawn ta chiah. Open Era-ah Melbourne Park a chak zawn rei record, Andre Agassi siam a tluk chiah a. Semi-final ah Tommy Paul a hneh chuan Nole hian record thar a siam dawn a. A vawi 10 nan Melbourne Park ah a champion thei a nih chuan Tennis GOAT nih a hnaih leh sual sauh ngei ang!
Djokovic hmachhawn leh tur Tommy Paul hian nilaini khan inelna neih meka khel tha tluang, rin phak baka chetha Ben Shelton hmachhawnin, set khat hloh chungin a chak a. World No. 35 mi Paul hian kum 20 mi Ben Shelton hi 7-6 (8-6) 6-3 5-7 6-4 a hnehin semi-final a lut. Semi-final ah he hmuna vawikua chet champion tawh Novak Djokovic hi a hneh thei a nih ngat chuan Tennis a inlehthalna lian zingah chhiar tel a ni ngei ang.

Djokovic leh Tommy Paul te hi an vawikhat inhmachhawnna tur a ni a. La intawng ngai lo an nih vangin an khelh dan turah rinlawk dan thiam a har viau a. Ring lawktu tam tak chuan Djokovic hi set thum la zawna chak turah an ngai hlawm.

Djokovic leh Paul ten semi-final an luh hma hian Greek third seed Stefanos Tsitsipas leh Russian Karen Khachanov ten last 4 an lo lut tawh bawk a, Tsitsipas leh Khachanov te hian final luh an inchuh ang a. Semi-final hi zirtawpni ah ve ve khelh a ni ang.