Ramdang leh state dang ami ten ram lei nasa?

State dang leh ram dang atanga tunhnaia Mizorama rawn lut ten ram an lei nasa tih sawi chu enchiang a, dan hmanga titawp tura Revenue department hotute ngen an ni.
Centre for Environment and Social Justice (CESJ) chuan Thawhtanni khan Land Revenue & Settlement secretary hnenah ziaka thlenin, tunlai hian chhan hrang hrang avanga state dang leh ram dang atanga Mizoram rawn lut ten ram an lei nasat thu a thang nasa a, hmun thenkhatah phei chuan in 50 sak theih a, hmun khata awmkhawm nan ram an zawng tih hriat a ni tih a sawi.
‘Mizoram hi Zo chi peng, ram dang leh state danga awmten an Inpui a ni tih an pawm chuan keini pawhin kan pawm. Amaherawhchu, chhan hrang hrang vanga state dang leh ram dang atanga lokalte hian, Mizoram inrelbawl dan leh khawtlang kalphung (political, social and cultural norms) an zawm tur a ni a. He ram danpui leh a hnuaia dan hrang hrang pawh an pawisa in an zah tur a ni. Chutianga awm tura kan beisei a nih erawh chuan, keimahni hian kan khawtlang dan leh ram dan dinglaite kan kenkawh that hle a ngai thung a. Dan kenkawh khauh a ngai a ni,’ a ti.
Thuthang awm hi a tak a nih chuan, hetianga ram lei leh hralhnaah hian, a hralhtu leh a leituten The Mizoram Land Revenue Act 2013 bung 9 Section-98 clause 1 to 5 an bawhchhia tih CESJ hian sawiin, ‘Hei hian ram inrelbawlna a palzutin a zah lo a. Khaw khat daih inbawk khawm tumna awm anga lang hian, chibil ang zawnga inbawlhran leh inlakhran tumna a thlen thei a, a rang thei ang bera tihtawp a ngai. Dan thlawhchhan tur tha tak kan nei chung a, hetiang thil ngawihbo san hi thil thiang a ni lo,’ a ti.
Duh duhin ram an hralh leh an lei chu dan tarlan tak hmanga titawp a, tun chinah ram lei leh hralh chu dan hnuaia kalpui tawh tura a rang thei anga hma la turin an ngen tih an thlen.