Ramhlun Veng hming phuah dan lungphun, Mizoram Upa Pawl Ramhlun Area-in a buatsaih chu Thawhtanni khan Aizawl North II bialtu MLA Dr Vanlalthlana’n a hawng.
Kum 1959 Pathianni inkhawm banah pa ho kalkhawmin veng hming atan an duhte lakhawmin Pu Salhnuna, mitdel, pa ho kalkhawm zinga upa ber pawhtir a ni a, ‘Ramhlun’ tih ama phuah chu pawtfuhin, chuta tang chuan Ramhlun Veng tih hi a lo piang chhuak ta a. Veng hi nasa takin a thang chhoin, tunah hian local council pawh panga – Ramhlun South, Ramhlun Vengthar, Ramhlun North, Ramhlun Venglai leh Ramhlun Sports Complex a piang tawh a ni.
Lungphun hawnna inkhawmah MLA Dr Vanlalthlana chuan, MUP Ramhlun Area-in Ramhlun hming phuah dan lungphun hawnna an buatsaih chu tha hlea a hriat thu sawiin, “Tunlai thangthar zingah Ramhlun Veng pian dan hria kan awm mang tawh loh lai a, MUP-in nachang hre tak chunga hriatrengna lungphun an siam hi a lawmawm a; thangthar lo awm zel turte tan tangkai tak a nih ngei ka beisei a ni,” a ti.