Ramri buaina la sawi thleng lo

Kar kalta Zirtawpni, August ni 9-a Mizoram leh Assam ramri buai chinfelna tura state pahnih aiawhte inbiakna Aizawla neih chu state pahnih ten ramri buai chingfel tura inbiakna tum li an neihna ni tawh mah se, ramri buaina lai tak an la sawi thleng lo. He inbiakna hian, ramri bulhnaiah buai a awm lohna tura hma lak dun zel ni se, an ti a ni ber a; nakum March ral hmaa Guwahati-a inbiak leh tur, tih chu thudah a ni bawk.
|um thum inbiakna kalpui takah te khan, status quo kha an sawi thlen a ni mai a. Tun tumah pawh hian ramri bulhnaia buiana a awm lohna tura hmalak dun tih bak, technical thil sawi thlen a la ni ta chuang lo a. Nakum March thla hmaa inbiakna neih leh turah pawh hian technical thil chu sawi thlen a la nih loh hmel hle a ni.
Ramri buaina chingfel tur hian vawi hnih khat inbiakna neiha chinfel mai theih a ni lo tih chu tlang hriat a ni awm e. Thil pawimawh hmasa chu, inbiakna neih mek a nih laia ramri bulhnaia buaina awm lo tura ramri venhimna tha tak state pahnih ten an kalpui theih hi a ni. ‘Lehlamin kawng an rawn lai’, ‘lei an rawn dawh’, tih vel thawm sawi tur leh hmuh tur a awm reng chuan, technical thil sawi kai a harsa zel dawn tihna a ni a. Remna leh muanna a awm theih nan, joint cultural leh sports festival huaihawt tum a ni a, festival-a tel lo ten ramri-ah kawng laia lei an dawh tluk tluk si chuan hei hian awmzia a nei thui dawn chuang lo tihna a ni.
Kan hriat angin tuna Assam nena ramri buai neite hi Assam atanga kaih then Arunachal Pradesh, Nagaland, Meghalaya leh Mizoram te kan ni a. Meghalaya nen hian kum hnih kalta khan ramri chungchangah inremna siam a lo ni tawh a, Home Minister Amit Shah hmaah hming an sign a nih kha. Kha inremna kha Meghalaya leh Assam inkara ramri buai 18 zinga 6-ah chauh a la ni a, ramri buai awmna point 12 an la hmabak a, tunah hian inbiakna a la kal mek bawk. Nagaland nen hian ramri buai avanga inkahna a thleng zing tawh hle a, Nagaland hi Assam nena ramri buai nei hmasa ber an ni a, buaina pawh an nei turu ber a tih theih awm e. Ramri buai avanga inbeihna turu zual hi 1968, 1979, 1985, 2007 leh 2014-ah te khan a lo thleng tawh a ni.
Tuna Mizoram chief minister hian, ramri buai hi a term chhunga tihfel a duh thu a sawi tawh a, ramri buai chingfel thei chief minister nih hi, Zofate tana hrilhfak tling tur a ni ngei ang.