Ramri hung leh FMR thiah tum duhlohna rally CM-in a thlawp

India sawrkarin Burma nena inrina hung a tum leh Free Movement Regime (FMR) thiah a tum duhloa ZORO-in peaceful rally neih a tum chu chief minister Lalduhoma chuan tha a tih thu a sawi.
Zo Re-Unification Organisation (ZORO) hian Nilaini khan chief minister hi kawmin, Burma nena inrina hung a tum leh Free Movement Regime (FMR) thiah a tum chungchang an sawipui a. Chief minister chuan India leh Burma ramri hung a nih loh nan leh zalen taka kan inkalpawhna dan (FMR) hlih a nih loh nan Prime minister, Union Home minister leh sawrkar laipui hotu hrang hrang a sawipui tawh a, Mizoram huamchin bikah ramri hung lo tur leh FMR hlip lo turin a ngen tih a sawi. “Mizoram bik chu han ngaichang phawt ila, ramri hung leh FMR hi an hlip lo mai awm mange ka ti a ni,” a ti.
ZORO chuan India sawrkarin ramri hung a tum leh FMR thiah a tum duh loh lantir nan ‘peaceful rally’ a neih tur thu chief minister hi an sawipui a. Tha a tih thu CM hian sawiin, kawng hrang hranga tan tlan a ngai a, kiltin atanga beih ho a ngai tih a lo sawi a ni.
ZORO hian May 16 khian India sawrkarin Burma nena inrina hung a tum leh FMR thiah a tum duh loh lantir nan Zokhawthar leh Vaphaiah peaceful rally a nei dawn a. Hnam tana pawimawh tak a nih angin rally-a tel tur hian mipui an sawm tih an sawi a ni.