Ramri ngawt niloin thiamna lamah ram leh hnam humhalh a ngai – Dr R Lalthangliana

Ram leh hnam humhalhnaah ramri ringawt niloin thiamna lamah pawh kan humhalh a ngai tih minister Dr R Lalthangliana chuan a sawi.
YMA Bazar Branch Hnahthial chuan Ningani khan an kum 50 tlin, Golden Jubilee an lawm a. Bialtu MLA, minister Dr R Lalthangliana hian hmanpuiin, kum zabi 21-naah hian Zofaten thiamna tak tak luhchilh a ngai tih a sawi. India ramah Kerala dawta ziak leh chhiar thiam tamna dinhmun sang tak kan luah lai hian, Mizorama IAS tam zawkte chu hmundang atang rawn lut an ni a, Mizo zingah direct-a IAS lut kan awm ta mang lo, tia sawiin, “All India leh Central Service-ah te lut turin tan lak a ngai. Ram leh hnam humhalh kan tih rual hian, ‘ramri’ ringawt niloin thiamna lamah pawh kan humhalh a ngai. Zirtirtuten tan lak thar a, zirlaite pawhin rilru nei taka kan zir a ngai,” a ti.
Mizo nih ti nuamtu – tlawmngaihna chu sawifiah chi a ni loa, nunpui chi niin hmangaihna, duhsakna leh lainatna nun a ni, tih Dr R Lalthangliana hian a sawi. “Mi an harsatna leh mangan laia dawmchhuahna leh khaichhuahna hi tlawmngaihna a ni a, YMA leh Zofa, Kristian kan nih anga kan vawngnung tlat hi a ropui hle a ni,” a ti.
South Tuipui bialtu MLA hian kumin June 21 hian District AH&Vety Hnahthial chu June 21 hian hawn a ni dawn tih a puang a. PWD Road Division pawh hawng thuai turin chief minister-in ruahmanna a siampui tawh thu leh June 29 hian doctor rualin Hnahthialah Health Camp an buatsaih dawn thu a sawi.