Ran ang maiin mipui min enkawl – K Vanlalauva

Ran ang maiin mipui min enkawl
– K Vanlalauva
ZPM sawrkarin ro a rel danah ran ang maiin min enkawl, tiin MNF hruaitu K Vanlalauva chuan a sawi.
Zirtawpnia Mizo Hnam Run inkhawmah MNF National Core Committee member K Vanlalauva hian, chief minister-in kumin March 2-ah Lengpui Airport chu kan zo lo, tiin midang hnenah thehthang an tum tih a sawi a. ZMC pawh enkawl zo loa a inngaih laiin, hmanni lawkah master zirna a hawng leh lawi, tiin a sawi.
Sawrkar hmasa lamin Mizoram Subordinate Staff Selection Board a din chu hnawk tiin an thiat a, thawktute chuan anmahni biakrawn hmasa loa thiah a ni chu pawi an ti hle tih a sawi. ZPM sawrkar chuan sawrkar hmasa in harsa taka a din higher secondary school 12 leh high school 120 cancel in, MNF sawrkara adhoc grant in aid-a hlankai middle school 48 pawh engmah ngaihtuah chiang loin a cancel ngawt niin a sawi bawk.
Oil man tihsan a nih vang leh buhfai man tihsan a nih avangin mipui an phun nasa a. Thildang man pawh a san phah zel, tiin, “He sawrkar hian ran ang maiin mipui min enkawl a ni tawh ber,” K Vanlalauva hian a ti.
Sawrkar kal tawhten kum 5 hnuah engtin nge kan awm ang, tiin ngaihtuahna an hmang hmasa thin a; chutianga ngaihtuahna seng lo tan kum 5 bak sawrkar a har, MNF hruaitu hian tiin, “Zak loin an tih dikloh siamthat hna thawk turin sawrkar hi ka ngen a ni,” a ti.