Ran enkawl kawnga khawtlang zirtir turte hriat tul zirtir hmasa

Ran enkawlna lama khawtlangin an hriat tur tul hrilh a, a tul anga chechhuak thei tur mi chu an hriat tur zirtir hmasak an ni a. Aizawla an training hi October 1-17 chhung awh tur a ni.
National Dairy Development Board, Anand Gujarat; Mizoram AH & Vety department; Mizoram State Rural Livelihoods Missions (MZSRLM) leh SIRD&PR Mizoram tangho buatsaih, Accredited Agent for Health and Extension of Livestock Production (A-Help) batch 6 leh 7 tana training hi Thawhlehni khan MzSRLM chief executive officer Zosangzuali Pachuau chuan a hawng.
A-Help training chhuak tawhten an khua theuhah tangkai taka hna an thawk thin chu lawmawm a tih thu MzSRLM CEO hian a sawi a. Self help group member-te chu anmahni khua theuhah midang tana malsawmna ni zel tura chahin, tuna training an zawh hunah pawh mahni veng/ khua ah chhawrnahawm tak nih tum turin a chah.
AH & Vety joint director Dr Vanlalhruaia chuan ran atanga thil siam quality tha thawn chhuak turin ran hrisel tha neih hmasak a tih tih a sawi a. Hemi tur hian thingtlang kilkhawr ber thlenga hma lak a ngaih avangin A-HELP ruahmanna hi lo chhuak a ni tih a sawi.
Training-a telte hi ran enkawlna atana an hman tangkai tur A-Help kit pek vek an ni a. Phullen, Reiek, W Phaileng, Thingdawl, Khawbung, Aibawk leh Tlangnuam RD Block atanga MzSRLM hnuaia Livestock Community resource person thlanbik mi 50 chu batch hnihah thenin, master trainers leh external facilitator-ten an zirtir ang.