Ran khuahkhirhna dan an putluh ennawn tum hi ZPM-in an mawng an hlimna a ni – Lalchhandama Ralte

ZPM-in Aizawl Municipal huamchhunga ran khuahkhirhna dan ennawn an tum thu an sawichhuah chu, anmahni dan putluha an pass a nih avangin, an mawng an hlimna a ni tih MNF hruaitu Lalchhandama Ralte chuan a sawi.
Thawhtannia Mizo Hnam Run inkhawmah MNF vice president Lalchhandama Ralte chuan, AMC inthlan hun February 2026-a zawh hman tur, chhuanlam tur engmah awm lo kha ZPM-in chak an inrin loh avangin chhuanlam siamin an sawn hla niin a sawi a. Ran khuahkhirhna dan an putluha an pass ngei pawh ‘kan ennawn dawn’ an ti nia sawiin, an mawng an hlim tihna a ni tih a sawi.
ZPM sawrkar hnuaia tax sang em em chu AMC-a sawrkarna an siam chuan, miretheite min sawr fu zel ang tih chu an ke pen dan enin a lang chiang tih a sawi a. “Aizawl mipui hian vote an pek ka ring loa, kum hnih erh awrh an sawrkar chhunga kan ipte an zen dan en hian zirtirna pek an ngai,” a ti.
ZPM sawrkar hnuaiah aia upa zahna a tlahniam a, mahni dik bera inhriatna, tha bera inngaihna leh sawrkar kal tawhte engmah loa chhuah chu thil thar hmuh theih langsar a ni tih MNF vice president hian a sawi.
“Fel famkim bika insawite sawrkarah chuan a hmaa nasa taka an sawisel restricted tender phei chu, khawvela la awm ngai lo, blanket approval hial an pe a. Thil ho te teah FIR nena an umzui laiin, minister hluiten corrupt ber leh Lengpui ram chungchang an sawi chu an bawhzui ngam lo. Hengte hian he sawrkar corrupt zia hi a tifiahin ka hria,” a ti.
ZPM sawrkarin Mizoram khawpui (capital) sawn tumin hma an la tih a sawi a. January 2026 khan Prime minister hnenah DO letter ziakin chief minister chuan Mizoram khawpui sawn dilna a thawn a. Eptu lamin an hrechhuak dawna an hriat hnuah ‘Thenzawl Peace City’ tiin an thlak leh tih a sawi. Municipal sum tur telin sum tam tak an ti lapse tih a sawi bawk.
“AMC inthlanpui atan MNF-in candidate kan nei tha ber a, sawrkar siam leh ngei kan beisei,” Lalchhandama Ralte hian a ti.