Rawlthar beiseiawm zual parukte

Football ah season thar tan a ni dawn hnai a, kan nghahhlelh em em season thar kan nghakchhuak tep tawh. Tun tumah hian season tharah rawlthar chetha zual tura beiseiawm zual parukte kan tarlang ang
Ayyoub Bouaddi – Morocco
French Ligue club Lille tana khel mek kum 18 mi Ayyoub Bouaddi hi club leh ram tan hmuhnawm takin a inlan a, World Cup 2026 chhawr tangkai ber berte zingah a tel. Defensive player a ni a, ball a thiam, a fimin a inringtawk bawk si a, a che vel a puitling ruih. Brazil an hmachhawn tumin a thiamzia a lantir a, ngaihven a hlawh thar nghal hluai. Morocco in quarter-final an khelh thlengin player tangkai leh ngaihven hlawh a ni.
Kum 18 mi lek ni chunga World Cup-ah a chet that em vangin Bouaddi hian club lian zawkte awh rawn a hlawh hle. Lak tuma ngaihven zingah Arsenal, Liverpool leh PSG te an langsar a, Lille erawh chuan kum khat tal la kawl hram an duh viau thung. Barcelona in Spain midfielder Rodri lak an tum mek a., Rodri hi chhuak thei dinhmunah a din vangin City in Rodri hmunruak luahtu atan Bouaddi hi lak an tum thar ve leh. Holding midfielder tha an mamawh em vangin City hian Bouaddi hi an mamawhna a sang hle.
Kum 18 mi Bouaddi hi Lille atanga a chhuak dawn a nih chuan €50 million vel bawra lak ngai tur a ni ang.
Yan Diomande, Ivory Coast
RB Leipzing leh Ivory Coast tan a khelh that theih em vangin kum 19 mi Yan Diomande hian World Cup 2026-ah ngaihven a hlawh hle. World Cup-ah beisei angin khel tha lutuk lo mah se nipui bazarah thawm a nei lian a, ngaihventu a nei hrawl hle. RB Leipzig in ui viau mah se football club hausa Real Madrid in lak an duh miau a, sum tam tak sengin an la lut.
An player duh zawng hlah ngai mang mang lo Real Madrid hian kum 19 mi Yan Diomande manah hian Euro 125 million zet an seng a, a khelh that dan a zirin Euro 15 million thleng pek belh leh thei dinhmunah an ding bawk. Kum naupang te ni chungin football club ropui Real Madrid tan a khel dawn a, season tharah pawh player ngaihven hlawh tak a ni dawn. A kum a naupang a, a man a to bawk si a, pressure rit takin a delh ngei dawn a, Diomande hian a tlukpui mai ang nge, a thatzia a lantir zawk ang tih hriat a chakawm tawh hle.
Nico Paz, Argentina
Lionel Messi-a’n Argentina tan par a chhuan hma khan kum naupang, ball thiam chhuak thar apiang kha ‘New Maradona’ tih thin an ni a. Lionel Messi ropui hnuah erawh chuan ball thiam chhuak thar apiang mai kha ‘New Messi’ an ti zel tawh. Nico Paz ngei pawh hi ‘Messi thar’ an tih a ni a, Argentina in hma lam huna beisei an nghahna a niin Messi hmunruak luahtu tura an vauchher a ni.
Kum 21 mi Nico Paz hi Real Madrid academy La-Frabica atanga inzirchhuak a ni a, Spain khua leh tui nihna nei niin Spain tan pawh a khel thei naa Argentina tana khelh a thlang ta zawk. A chawrchhuahna Real Madrid senior team tan a khelh chhunah a khel chhe lo viau zel.
Hmabak eng tak nei bawk mah se khelh tam theihna hmun tur pan rih a thlang a, Como a pan. Como tan a khel tha chho viau a, Real Madrid ngei pawhin lak let leh tumin an ngaihven hman. Campions League khel tur Como-ah player pawimawh a nih vangin atan cham chhunzawm a thlanawm zawk. Champions League-a a inlan bakah Argentina tan a inlan tam chho tan tura ngaih a ni a, beiseina sang tak nen football ngainatuten an thlir mek a ni.
Lamine Yamal, Spain
Kum 18 mi lek ni chungin Lamine Yamal hi khawvela football er tha leh ropuite huangah a awm der tawh a, super star a ni der tawh. Player pawimawh ni chungin Barcelona chu La Liga-ah vawi hnih a champion pui tawh a, Spain pawh Euro 2024 leh World Cup-ah a champion der tawh bawk. Club leh ram tan trophy lian leh pawimawh a la zawn.
Yamal hi kum 18 mi lek ni chungin Ballon d’Or dawng tura rinkai zual zingah a tel phar der tawh a, 2025 khan pahnihna a ni nghe nghe. La Liga-ah Barcelona an champion a, World Cup-ah Spain an champion zui leh bawk si a, Yamal hian Ballon d’Or a dawng nawlh a nih pawhin a mak lo ang a, thil awm tak a ni ngei ang.
Ball thiam bik Yamal hian match tinah hmuhnawm a lantir thin a, thiamna ril chungchuang bik nei tlemte zinga pakhat niin transfer market-a a hlut zawng pawh €200 million zet a ni. Footballer ropui Lionel Messi, Cristiano Ronal leh Neymar ten chuai lam an pan tawh a. Yamal hi player ropui, football ngainatute mit titlaitu ni leh tura vauchher mek a ni.
Pau Cubarsí, Spain
Kum 19 mi chauh ni chungin Cubarsi hian Barcelona leh Spain tan centre-back tha bik a nihzia a lantir der tawh a, an player pawimawh a ni.
Cubarsi hian Barcelona hi La Liga-ah a champion zawnpui a, World Cup-ah Spain an champion theih nan a thawhhlawk viau a, World Cup 2026-ah khan rawlthar tha berah thlan a ni nghe nghe a, a phu tak zet. Kum 19 mi lek ni chungin khawvela forward tha leh hlauhawm ber ber a hmachhawn deuh vek tawh a, boruak sang takah pawh a chiai mai ngai lova, fim takin a inlan thin a, a talbuai ve mai mai ngai lo.
Kum 19 mi lek ni chunga club ropui Barcelona leh World champion Spain inngahna a ni der tawh hian Cubarsi ropui bikzia a lantir a, transfer market-a a hlut zawng pawh €80 million zet a ni. Defender thiam leh fing tak mai a ni a, Real Madrid forward te a dang thei fu lehnghal a, season tharah pawh a chetthat zui leh viau a beiseiawm hle a ni.