Rawng siam nan kuhva hralh dawn:CM

Mizoram kuhva chu rawng siamna atan man man zawka hralh a ni dawn tih chief minister Lalduhoma chuan a sawi. Mizoram Economic Association buatsaihin Thawhlehni khan Aizawlah Mizoram Economic Summit 2024 neih a ni a. Hmanpuitu chief minister chuan Mizoram kuhva hi rawng siamnan hralh a ni dawn niin a sawi.
“Kan process loh chuan market tha kan nei thei tak tak dawn lo,” tia sawiin, gutkha siamnana hmang duh awm mah se, an remti lo tih a sawi. “Amaherawhchu, rawng siamna atana siam duh kan hmu a. Chu mite chuan a rang thei ang berin an rawn ti anga, kan kuhva ho hi chu an lei fai thei vek turah an inngai. Tichuan, rawng siamna atan kan ti anga, man man zawkin kan la hralh thei thuai ang,” a ti.
Chief minister hian statistic dik an siam thei lo tih a sawi a. Mizoram GSDP (gross state domestic product than dan hi an ni chuan an awih ve lo tih sawiin, “Hei kan han sawrkar ve a, tihdik kan han tum a, a lo har khawp mai,” a ti. Statistics department-in department hrang hrang atanga an dawn kha an lo tidanglam thei lo tih a sawi a. “Kan figure hi a dik vak lo a ni, dik chiah chuan,” a ti.
Sawrkarna an chan khan leiba tam tham tak an chhawm avangin an kawng a chho nghal hle niin Lalduhoma hian a sawi. Theihtawp chhuahin, renchem takin sum an enkawl a. Chuvang chuan tunhmaa RBI (Reserve Bank of India) balance chhe tak nei thin khan sawrkar kum kaltaah kha chuan RBI balance vaibelchhe 500 chuang an nei ta tih a sawi.
Healthcare sum ba, power bill ba an pe thei a. Power bill-ah phei chuan rebate hmu hialin an titha tawh a. GP fund tam tham tak pek chhuah a ni a, pension sum rei tak tak tang tawh chinfel a ni a. Election duty bill tang tam tak pek a ni a, sawrkar hnathawkte hlawh leh hamthatna, hun rei tak lo batsak tawh chu engemawzat chinfel a ni tih a sawi bawk.
Project reng reng department-in ama thua a lo thehlut ve mai thin kha an remti tawh loa, Planning department kaltlang chauha thehluh tawh nise an ti tih chief minister hian a sawi. Hetiang bawk hian CSR (corporate social responsibility) pawh CM office atangin an vil tawh dawn nia sawiin, “CM office-in CSR hna thawh kan tum a ni loa, mumal leh felfai zawka CSR kalpui kan tum zawk a ni,” a ti.
Department tin chu Service Review Committee din turin an ti a. Sawrkar hnathawk tlak lote dap chhuak a, a tul anga bantir thlenga hmalakna tur a ni tih a sawi a ni.
Mizoram Economic Association hi Mizoram University leh college-a Economics department-a thawktu leh zirlaite telna, economics lama tui apiangte tel theihna pawl a ni.

Mizoram Economic Summit-a CM thusawi dang:

8 K deposit-a sum kum thum aia rei dah tawhte kan dap khawm mek a, cheng vaibelchhe 400 chuang kan la chhuak tawh.
8 Integrity pack kan buatsaih a. Hei hi chhungkhat laina hnaite duhsak taka contract pek tumna vengtu pawimawh a ni.
8 Kan procurement rules hian man to takin thil min leitir thin niin kan hria a. Sawrkar sum renchemnan he dan hi siamthat a tulin a lang.
8 Hmasawnna hnathawhna tur sum kan puk thenkhat hi state share sang lutuk chi a lo awm a. Heng ang hi pumpelh hram hram tha kan ti. A theih chin chinah 100% grant leh 90:10 ang chi lam hawi kan duh.
8 Contractor-te agreement kan ziahpuiin contractor tana tha bik rana ziak loa, a sum tumtu sawrkar lam tana tha tur dap zel kan tum. Hnathawh chhia leh contractor thiltih fel loa kan hrem theih loh hian hna in a tuar a, sawrkar sumin a tuar bawk thin.
8 Project kan ziahin central scheme nena inhnerem zel kan dap tur a ni a, central scheme kan chhawr thiam tur a ni. Sawrkar department leh agency-ten an tih theih ve reng consultancy firms kan tih tir thin hi tih tlem a ngai.
8 Kawngpui bitumen (alkatra) hmanga kan siam thin hi keini, ruahtui tamna ram tan chuan a tha tawk lo nia kan hriat avangin ministry-ah rigid pavement hmanga kawngpui min siamsak tawh turin ka ngen.
8 Pending projects a tam tawh avangin a thehluttu department-ten an ngaihven zui tawh lohte a awm. Heng hi singsaka kan ram mamawh mila thliarfel a ni ang.
8 SDG dashboard leh Project Monitoring dashboard kan hawng thar a, project kan vil uluk hle tawh dawn. Utilization certificate hi central hian a hlawma pek fel zel a phut tawh a, department thawk zo hma kha a zo tlaiten an hnuk khawmuang tho tho thin. Heng hi vil uluk ngai kan ti.