RD hmalakna chin Union minister-in a hriatpawlh – RD minister

Mizoram Rural Development department hmalakna chungchanga tunhnaia Union RD minister-in a sawi danah, an department hmalakna chin a hriatpawlh nasa tih RD minister Lalruatkima chuan a sawi.
Assembly Session-ah ZPL Group leader Lalduhoma chuan Union RD minister lokalin RD hnuaia kawng laih a lungawithlak loh zia a sawi thu te; PMAY hnuaiah chhungkua 15674 te in sak na tur central-in a rawn pe fel vek tawhah Mizoramah chhungkaw 5800 chauh an la pe a, an pek sa an hman zawh loh chuan a dang rawn pek an tum tawh loh thu te a sawi tih a sawichhawng a. In sakna tanpuina dawng miah lo hnenah in sakna anga signboard tar tir tum ngawt a awm thu a sawi a ni.
RD minister chuan an department kawng laih a chhiat awm an hre loa, zawhna zawttu hian PMGSY nen a hriatpawlh a nih a ring tih a sawi. “PMGSY hi Ministry of RD hnuai ami chu a ni a, RD hi nodal department a ni si lo. Ministry lamah pawh RD enkawl emaw ti an awm thin a, Mizoramah chuan state PWD hnuaiah PMGSY hi kalpui a ni,” a ti.
PMAY-ah rural leh urban a awm a, urban hi UD&PA hmalakna a ni. PMAY pawh hi hriatpawlh a ni thin tih a sawi. Kum 2021 ah RD department-in Socio Economic Caste Census data angin beneficiaries hi an upload a. 2017 & 2018 ah heta awm ve lo te hi awaas plus-ah thlan leh an ni a. In sa anga sawi, la sa si lo hi RD department-in a buaipui chinah chuan an awm an hre loa, department dang hmalakna PMAY Urban-a awm nen hriatpawlh palh a nih a ring tih a sawi a ni.
Union RD minister lokal khan Sap tawng a thiam loa, Vai tawnga a sawi kha an let kual a, PMAY urban area leh rural area a paltlang pawlh bawk si a, a hriat dan a diklo tih an official-te nen pawh an lo sawi tawh niin Lalruatkima hian a sawi. Amah zuitu officer-te pawhin thiam ang tawk tawkin an hrilhfiah chungin, rawn pawm dan sa a nei a, RD hnathawh tha tawk lo anga press conference-a sawi kha a hriat dik tawk loh vang tih a sawi a ni.
“RD hmalakna bik, PMAY Gramin-ah direct benefit transfer a nih avangin an sanction rual rualin beneficiary-te account-ah a lut a, state matching share pawh hmuh tlai lutuk awm lem lo, hmun thenkhatah phei chuan central share sanction hmaa SMS dawn kan nei. Mirethei in sak turah tihkhawtlai emaw inchinfel har avanga harsatna engmah RD ah chuan a awm lo,” a ti.