RD office thlunzawm dawn

North Eastern Council hnuaia Rural Monitoring & Information System kalpuinana computer set leh hmanraw dang dawn chu Ningani khan sem a ni a. RD minister Prof. Lalnilawma chuan a hmanpui.
Mipuiin awlsam zawka Rural Development department an dawr theih nan leh sawt zawka hmasawnna hna kalpui a nih theih nan RMIS chu tangkai taka hmang turin RD minister hian a chah. An department chu thingtlang khawsak dinhmun chawikan leh tih hmasawn hna thawktu an nih angin Mizoram khaw hrang hranga harsatna awmte zirchiang turin an awm kual tam a pawimawh tih a sawi a. Ruahmanna tha siam turin thawktuten tawnhriat an neih tam a tul tih a sawi bawk.
NEC scheme hnuaia RMIS project hian RD Secretariat, Directorate of RD, DRDO office 11 leh RD Block office 28 tan computer 55 leh a kaihhnawih hmanraw dang, software development, server system leh skill development training a huam a. He project hi cheng nuai 249 hu niin, NEC atangin 1st leh 2nd instalment atan nuai 200.096 hmuh tawh a ni a, nuai 48.904 hmu leh tura beisei a ni.
He project-in a tum chu, RD department hnuaia office hrang hrang software application hmanga thlunzawm a ni a. Department hnuaia hmalakna tha zawk leh chak zawka kalpui a nih theihna atana ruahman a ni.