Real chak zawh loh zana Bellingham demtu Barcelona manager Flick

Real chak zawh loh zana Bellingham demtu Barcelona manager Flick
Inrinni La Liga inkhel pakhata Osasuna muala Real Madrid an chak zawh loh zanah an midfielder Jude Bellingham chu chawlhlawk hma minute ruk la awmah straight red card hmangin referee Jose Luis Munuera Montero chuan a hnawtchhuak a; Barcelona boss Hansi Flick tawngchhuak nghal vatin, match official-te thutlukna a sawisel danah England international demna a auchhuahpui.
Bellingham hi referee chunga anchhe lawha puh niin, a hnuah Englishman hian referee ni loin amah leh amah a indemna a nih zawk thu a sawi a, referee rilru hliam a tum loh thu leh inkhel hamtuin a thusawi a hresual mai mai niin a thiamthu a sawi a, a manager Carlo Ancelotti pawhin hei hi a thlawp thu a sawi ve tawh bawk.
Real Madrid leh Osasuna-te sikhat ve ve thuna an inhnehtawk tuma red card chungchangah khan Barca coach Flick chuan kum 21-a upa Bellingham a dem hle a, midangte zahna nei loah a puh hmiah!
Bellingham-a chet dan chungchanga an zawhna chhangin Flick chuan, “Inzahlohna a ni a, mahse, kei hi comment lo petu tur erawh ka ni lo.
“Khati ang thil kha player-te hnena ka sawi fo thin niin, hun khawhral tura referee hnial vak vak hi engnge a sawtna ka ti thin a; captain an awm a, ani kutah referee hnial ngai chu dah mai tur.
“Osasuna muala nungchang ka hmuh kha ka rilrem zawng a ni hran lo a, red card hmuh hi chuan kan chaklohna lai a entir thin,” a ti.
Real Madrid a zawm hnuah tun kha Birmingham City player hlui Bellingham-a red card hmuh vawihnihna niin, a hmasa zawk chu March 2024-a Valencia muala 2-2 draw an hlawhchhuah tum kha niin, kha pawh kha referee a hnial vang bawk niin, yellow card hmuh nawn vanga chhuahna thupek hmu a ni.
Inkhel boruak a sang bawk a, Real manager Carlo Ancelotti ngei pawh yellow card hmanga bengdaih ngai khawpin a tawngchhuak a; a chhan pawh penalty vawithum ngawt hlawhchhuak tura a inngaih laiin Vinicius leh Bellingham laka lehlam pawl foul chu penalty-ah ruat a ni lo a, box chhunga Alejandro Catena ‘handball’ pawh ham a ni lo a, a lungawi lo thinrim a tawng na ve deuh a ni.
Pamplona khuaa El Sadar Stadium chhunga mipui 22,390 pungkhawm hmaah Kylian Mbappe chuan minute 15 an khel tling hlawt tihin mikhual goal hmahruai a thun a, Bellingham hnawhchhuah a ni chungin Ancelotti team khan half time-ah sikhat faiin hma an hruai tluan.
Second half tir lam minute 58-ah Osasuna forward Ante Budimir chuan Eduardo Camavinga laka a hlawhchhuah penalty hmangin mualneitu team siphurh a sut a, goal dang luhbelh loin team pahnih an inhnehtawk a, Bernabeu club hmahruaina a derthawng zual ta a ni.
Inrinni inkhel dangah pahnihna luahtu Atletico Madrid pawh chak zo bik loin an mikhual Celta Vigo nen 1-1 bawkin an inhnehtawk a, kha vang khan Real Madrid chuan point 51 neiin hma la hruai zui hram hram a, Atletico lakah point khat bawka inthlauin, nizan Spanish top flight inkhel dang result tarlan hman lohah pathumna Barcelona-in Rayo Vallecano an hneh chuan goal difference hmanga hmahruai theihna chance an nei.
Real an talbuai rei ta viau a, tun kha La Liga bika game thum chhung hnehna an chan zawh lohna ni tawhin, an title kawl lai humhim an tumna kawngah an dinhmun a derthawng zel rih.
Atletico Madrid 1-1 Celta Vigo
Minute sarihna leka an player Pablo Barrios hnawhchhuah a ni chung pawhin Atletico hian first half-ah goal an chhuah lo tluan a, mahse, minute 68-ah penalty an chawi hlauh a, Iago Aspas chuan Vigo hmahruaina goal chhuihlutin, Real Madrid lehpela hmahruai theihna hun remchang nei Atletico tlawm thei dinhmunah an ding hman!
Minute 81-ah Alexander Sorloth chuan mualneitu team siphurh sut hramin, Metropolitano khelmualah Madrid club-in harsa takin point khat an hlawhchhuak hram a ni.