Real Madrid in Bellingham an lei fel

Spanish La Liga club lian Real Madrid chuan rawlthar tha ber zinga mi Jude Bellingham chu Borussia Dortmund atangin an lei fel a, kum ruk daih contract an ziahpui.
Real Madrid hian Jude Bellingham manah 103m euros (£88.5m) an thehchhuak phawt a, kum 19 mi hi a khel tha chho viau a nih chuan Bourssia Dortmund hnenah Bellingham man an pek belh leh a ngai dawn a. Man pek belh ngai khawpa a khel tha a nih chuan a man hi 133.9m euros (£115m) thlenga pung chho thei dinhmunah a ding.
“Borussia Dormund chhungkua zawng zawngte chungah ka lawm tak zet. Kum thum chhungin hun hlimawm tak kan hmang ho a, BVB jersey ka ha thei hi ka tan chawimawina a tling a, ka chhuang kumkhua tawh ang. Hmasawn zel tur kan nih angin Real Madrid ka pan dawn a, zin kawng kan zawh ho zawng zawngte hi ka theihnghilh leh tawh ngai lo ang”, tiin Bellingham chuan Dortmund thlahna thu a sawi.
Real Madrid midfielder thar Jude Bellingham hian Birmingham City atangin bul a tan a, English club-ah hian beiseiawm takin bul a tan. Tleirawlte inchher hriamna hmun tha leh lar tak Borussia Dortmund chuan kum 202 khan £25m sengin an lei a, hetihlai hian Bellingham hi kum 17 mi zingah khawvela footballer manto ber a ni hial. German club lian Dortmund-ah hian a hming a chher hle a, kum 19 a nih meuh chuan khawvela midfielder tha zingah chhiar tel a ni hial tawh a. Season liam ta khan German Bundesliga player tha berah thlan a ni ta hial nghe nghe. Hmabak a neih en em vangin club lian hrang ten lak tumin an hel a. Premier League club lian Liverpool nen an inhnaih hman viau a, Reds nen an inrem theih loh hnuin Manchester City in an ngaihven ve leh naa khawvela club hausa ber Real Madrid an rawn lang a, Madrid hian an lei fel ta a ni.
Bellingham hian Borussia Dortmund tan Bundesliga-ah vawi 92 khelin goal 12 a thun a. England tan vawi 24 khelin, goal 1 a thun tawh bawk. Kum naupangte ni chungin England tan hmun pawimawh a chang der tawh.
Jude Bellingham hi British player manto ber dawttu a ni thar a, a chungah Manchester City player Jack Grealish a awm. Arsenal in Declan Rice an la thei a nih chuan Rice hi British player manto ber ni thei tura ngaih a ni.