A laka i rilru put hmang kha i hrilh ang em?

A laka i rilru put hmang kha i hrilh ang em?
Chiang lo riai a awm reng ai chuan hriatchian law law hi a tha zawk fo thin. Chutiang chu i duh deuh i tawn hun pawha tihdan tur a ni, mahse, tlema huaisen ve deuh te chu a ngai!
A hmasa berah chuan mipain hmeichhia a duh tih tihlan a tumdan hi hmeichhiain a letlingin a lo dawngsawng hlauh thei. Mipa chuan hmeichhe hmuha han in-show-off te kha a duh tih lantir nan hman a tum ta thin a, mahse, chu chu hmeichhia ten an lo welcome loh zawng tak a lo nih hian a buaithlak thin.
A pawimawh hmasa ta ber chu ‘a duh ve che em?’ tih hi a ni. A duh ve che a nih phawt chuan restaurant changkang taka i hruai emaw, kawng sir thingpui dawrah i chawlh pui emaw pawh ni se a ngaihdan a danglam chuang lo. I sawi tur chu sawi la, a nih loh pawn huntha dang i nghak leh zawk a nih pawn a pawi chuang lo. A chhan chu a duh ve miau che a!
Engpawh nise a duh zawng i nih loh chuan engtiang pawhin ti la awmzia a nei lutuk lo ang. A pawi khawp mai, midang i zawn mai a ngai dawn tlat.
Hmeichhia chu in duh tir ngawt theih a ni lo. I tum nasat zawh poh leh i nawr hla telh telh zawk hlauh thei. Mahse, hei hi a letling zawng pawhin a thawk ve thei tho. I duhna te chu mi zingah ni loin, in pahniha inawm lai, midang hriat loh hunah i ti lang dawn nia.
Mood hi a pawimawh khawp mai. Hun remchang i nei a, in pahnihin in titi a, a hun a fuh ta maw tihah khan sawi tawp mai rawh le, “Thildang daih, ka duh che a sin,” han ti phawng mai la. Hmel hlim tak pu la, thil danglam engmah thleng lo ang maiin awm tum ang che. Chu chuan i che buai tur a veng ang che.
Tichuan in titi lai chu chhunzawm leh zel mai rawh le. Ani chu chet la hmasa ngam chi a nih loh chuan a taksa awmdan chik la. Chutianga i sawi tawh hnuah pawh i bulah ngaihngam takin a la thu a, in inhnaih viau a, pang insi renga inthu dun a nih chuan a kut vawn sak rawh le. Chu chuan engkim a sawi fel tawh ang. A kut chu a la sawn nghal vat em, nge a awmna ngaiah a dah reng zawk? A kut chu a la sawn lo a nih chuan a fuh tan hle a nia.
Mahse, hriat tur pawimawh chu ‘tlai luat’ tih hi a awm lo, chuvangin a hun tur thlang uluk la, a hun leh hmun thlan thiam loh chu a pawi ve thei tlat. A duh ve tho che a nih chuan kar hnih khat te chu i chet hun a lo nghak dawn tho tho, midang a lo melh san hman lo ang che.