Real Madrid in Chelsea an hnawtchhuak

April 18, Thawhleh zan khan UEFA Champions League quarter-final thawh hnihna khelh a ni a. Champion lai Real Madrid chuan Chelsea chu si hnih fai vekin an hneh nawn leh a, an hnawtchhuak chiang hle. Thawhleh zana inkhel dangah Italian Serie A champion AC Milan chuan an trophy kawl lai chhuhsaktu tur Napoli chu 2-1 a hnehin an hnawtchhuak ve bawk.
A mak zo zai seng mang e
London club lian Chelsea hi club neitu thar Todd Boehly hnuaiah bazar nan sum an seng hnem viau a. European club zingah bazar nana sum seng hnem fal ni mah se tun thlengin result tha an hlawhchhuak thei lova, champion theih beiseina an neih chhun Champions League atangin hnawhchhuahin an awm leh ta a. Season kal mekah trophy lak tur an nei lo a ni mai lova, EPL-ah 11-na an nih mek vangin season tharah European competition an hmachhawn phak dawn lo niin a ngaih theih ta hial bawk. Player tha tak tak nei chunga an tlawm nawn awn awn mai hi ‘a mak zozai seng mang e!’ tih loh rual a ni lo.
Santiago Bernabeu-ah si hnih faia tlawm tawh Chelsea hian Stamford Bridge-ah champion lai Real Madrid lehthal ngei tumin tan an khawh a. UCL hi champion theih an beiseina awm chhun a nih tawh vangin chak tumin thih thah tak meuh meuh an chhuah. An theihna zawng zawng hlan bawk mah se Real Madrid lakah si hnih fai bawkin an tlawm leh ta zawk.
Inlehthalna lian thlentir tum Chelsea hian bul an tan tha a, goal thun theihna hun tha an nei thuai. Minute 10-na lekah N’Golo Kante chuan goal thun teihna hun tha a neih chu uiawm takin a hlah a, goal zawnah pet thei lovin a hun tha a hloh. Kante hian pet goal se result a danglam phah dawr theiin a rinawm. Kante-a’n hun tha a hlah hnu hian Real in hun tha an nei zui ve leh a, Rodrygo pet tha tak chu si nghak Kepa-a’n dang thei lo mah se goal post in a lo chhanhim hlauh thung.
Stamford Bridge-ah mikhual team Real Madrid an huangtau lutuk tur khap daih nan Chelsea in goal thun theihna hun tha an nei leh a. Rawlthar duhawm Gallagher chuan tauh luh theihna hun tha nei bawk mahse goal chhungah a tauh lut zo lova, goal chungah tauh chhuakin, hun tha an hlah nawn leh. Chelsea hian chawlhlawk dawn hnaiah goal thun theihna hun tha fahran an nei nawn leh a, Marc Cucurella pet tha tak chu si nghak Thibaut Courtois chuan pui zetin a dang a. Courtois hian a team hlui lakah Real Madrid a chhanhim nawn leh. Tichuan, inkhel hmuhnawm taka chu goal awm lovin, first half a tawp ta phawt.
Chawlhlawk hnu lamah Chelsea in bul an tan tha leh viau a, goal thun theihna hun tha an nei leh nghal zat. Player thawkrim Kante chuan a hun tha neih a hlah nawn leh a, Real Madrid an him leh hlauh. Chelsea in hun tha an hlah fo hnuin Real Madrid zawkin goal an thun hmasa ta nge nge. Fuh zeta an nawr tlang hnuin box chhungah fuh zetin ball an inpe kual a. Minute 58-naah Rodrygo chuan Vinicius Junior siam tha tak chu buai nuaih nuaih kar atangin a pet goal a, hmahruaina goal a thun. Si hnih faia hmahruai tawh Real Madrid in goal an thun hmasak leh tak vangin semi-final luh tuma inelna a tawp fel thawhkhatna ngaih a ni a. Chelsea tan a beidawn-thlak ngawih ngawih tawh a ni ber mai.
London club lian Chelsea hian goal khat tal thun ngei tumin tan an khawh zui a, hun tha nei bawk thin mah se a hmawr an bawk fuh hleithei tlat lo. Chelsea in goal an thun theih loh zel hnuin Real Madrid bawkin goal an thun belh leh. La Liga club lian Real hian hun tawp hnaiah fuh zetin an khingpuite an nawr let a, Valverde chuan si ngak Kepa pet kanin Rodrygo tan tha zetin a chhawpsak a. Goal hmahruai thuntu Rodrygo hian minute 80-naah awlsam zein a pet goal a, an goal hnihna a thun. Hun tawp thlengin goal dang a luh belh thei tawh lova, Real Madrid chuan si hnih faiin hnehna an chang nawn leh a. Si belhkhawmah si li fai ngawta hnehna changin semi-final an lut.
Champions League-a champion ngun ber Real Madrid hian last 16 atangin EPL club lian Liverpool an hnawtchhuak tawh a. Quarter-final atangin Chelsea an pet thla leh bawk. Semi-final-ah EPL club bawk hmachhawn leh thei dinhmunah an ding mek a. Si thum faia Bayern Munich hneh tawh Manchester City nen final inchuh zui tura ngaih an ni a. City an hneh leh thei a nih chuan Real Madrid hi EPL club te tan chuan pul hri ang tluk zeta hlauhawm an ni ngei ang.
Milan in Napoli an hnawtchhuak
Quarter-final thawh khatnaah si khat faia Napoli hnehtu AC Milan chuan Napoli mualah tlawm an pumpelh a. Si belhkhawmah 2-1 a chakin semi-final an lut. Semi-final-ah Serie A team pahnih intum ngei tura ngaih a ni a. Milan derby kan hmuh theih a beiseiawm hle.
Si khata hmahruai tawh AC Milan hian Mimualah goal an thun hmasa a, minute 43-naah Olivier Giroud chuan hmahruaina goal a thun. Giroud goal hi an chakpui teuh hle a. Hun tawp dawn tep minute 90+3-ah Victor Osimhen chuan tauh goalin an si phurh a sut a. 1-1 in an inhnehtawk zui ta a ni