Suns an chak ve ta

Suns an chak ve ta
Nilai zing khan NBA play-off game hnihna khelh chhunzawm a ni a, game khatnaa tlawm tawh Phoenix Suns chuan LA Clippers an lehthal a, hnehna pawimawh an chang. Inkhel dangah Boston Celtics chuan Atlanta Hawks an hneh nawn leh thung.
Play-off game khatnaah Clippers ngam lova tlawm tawh Suns hian game hnihnaah bul an tan tha lova, quarter khatnaah point ngain hnufual zawkah an tang nghal. Quarter hnihna tir lamah pawh bul an tan tha lo viau a, point 10 zeta hnufual changte an nei hman. Dinhmun chhe zawkah ding mah se huaisen takin an inlan a, quarter hnihnaah an khingpuite an lehthal a. Chungnung zawk awm lovin chawlhlawk an hmang.
Chawlhlawk hnu lamah Suns an khel tha tluang ta viau thung a, quarter hnuhnung pahnihah chungnung zawkah tang ve vein, point 123-109 in an chak a, Clippers an hneh ve ta nge nge.
Clippers an lehthal tum hian Phoenix Suns tan Devin Booker chuan point 38 a thawkchhuak a, a chetha hle.
Nilai zinga inkhel dangah Eastern Conference second seed Boston Celtics chuan game khatnaa an hneh tawh Atlanta Hawks chu point 119-106 in an hneh nawn leh a. Series ah 2-0 a hmahruaiin, play-off second round an hnaih lehzual. Celtics tan hian Jayson Tatum chuan point 29 a thawkchhuak. Inkhel dangah Cleveland Cavaliers chuan point 107-90 in New York Knicks an hneh a, game hnih an khelh tawhah 1-1 a ni ta chiah. Cavaliers tan hian Darius Garland chuan point 32 a thawkchhuak.