Real Madrid leh Napoli an tlang ve leh

March 15, Nilai zan khan UEFA Champions League last 16, second leg khelh chhunzawm a ni a. Champion Real Madrid chuan Anfield-ah 5-2 ngawta an lo hneh tawh Liverpool chu Karim Benzemna goal thun hmangin an hneh nawn leh a, phu taka hnehna changin quarter-final an lut. Nilai zana inkhel dangah Napoli chuan Eintracht Frankfurt an sawp a, quarter-final an lut ve bawk.
Reds an chak lo, an vui lo e!
Khelmual ropui, mikhual team te an talbuaina thin Anfield-ah ngei 5-2 ngawta an tlawm tawh vangin Liverpool hi tla tlukna ngaih an ni nghal a. Santiago Bernabeu-ah thil mak tih tumin lenglut bawk mah se si khat faiin an tlawm leh ta tho a. Champions League-ah Real Madrid an ngam lo tluang zel. Real Madrid lakah an tlawm zawn chhan chu an khelh that tawk loh vang a ni a. An tlawm dan chu a fair tawk viau nia a hriat thu Liverpool manager Jurgen Klopp chuan a sawi a, an vui lem lo.
Inlehthalna lian thlentir tuma Santiago Bernabeu a lenglut Liverpool hian beiseiawm takin bul an tan a, inkhel tantirh lamah goal an thun nghal teuh hle. Mohamed Salah chuan tha takin Darwin Nunez ball pe bawk mah se Nunez hian Real si nghak Thibaut Courtois a pal tlang zo lova, goal thun theihna hun tha uiawm takin a hlah. Chawlhlawk hmanin Cody Gakpo in hun tha nei bawk mah se Courtois a paltlang thei bik lo. Mualneitu Real Madrid pawhin an hun tha neih an chhawr tangkai thei bik lova, chawlhlawk hmain goal thun thei an awm lo.
Second half-ah champion lai Real Madrid in bul an tan tha a, goal an thun teuh hle a, Valverde chuan a hun tha neih hlahin, Alisson a paltlang thei bik lo. Valverde hian tuah goal theihna hun tha a hlah a, Benzema pawhin pet goal theihna hun tha a hlah ve bawk. Goal thun theihna hun tha hlah deuh malh malh mah se na taka an khingpuite an nawr rah an seng a, Liverpool dan rual lohin goal an thun ta nge nge. Minute 78-naah Karim Benzema chuan Vinícius Júnior siam tha tak chu chiang zetin a pet goal a, hmahruaina goal a thun ta nge nge. An khingpuite lehthal tura goal thun tam mamawh Liverpool in goal an chhuah vangin inelna tawp fel ang hialin ngaih a ni a. Real madrid chu quarter-final lut chiang tawh ang hialin ngaih a ni. Benzema goal thun hnu hian goal dang a luh belh thei lova, Real Madrid chu an chak nawn leh ta a ni.
Anfield ah 5-2 ngawta an chak hnuin Santiago Bernabeu-ah 1-0 in an chak nawn leh a. Si belhkhawmah champions League-a vawk lal len Real Madrid chuan 6-2 ngawtin English club ropui Liverpool an sawp a, champion nawn leh thei tura hma lam pan hretin, quarter-final an lut ta a ni.
Napoli an chak nuamsa
Italian Serie A-ah point 18 zeta hma hruai fal tawh a, inelna hrang hranga khel tha tluang tak Napoli chuan Mimualah si hnih faia an lo sawp tawh Eintracht Frankfurt chu Diego Armando Maradona Stadium-ah an mikhual a, si thum faia hnehna chang nawn lehin, si belhkhawmah 5-0 ngawtin an khingpuite an sawp a, nuamsa taka hnehna changin quarter-final an lut.
Eintracht Frankfurt lakah English Premier League club lian ten an hmuhtaih em em Victor Osimhen a chetha leh viau a, goal hnih ngawt a thun. Osimhen hian minute 45+2-ah hmahruaina goal a thun a. Minute 53-naah an goal hnihna a thun zui leh bawk. Si hnih faia hma an hruai hnuin Serie A hmahruaitu Napoli hian minute 64-naah penalty an hlawhchhuak zui leh a. Penalty hi Piotr Zielinski chuan pet goal in an chakna a nem nghet.