Record siam chung quarter-final lut Djokovic

On Jun 5, 2024 22 0

French Open 2024 khelh mekah Novak Djokovic chuan thawhtan zan khan harsa takin hnehna an chang nawn leh a, Grand Slam-ah vawi 370 chak tlingin Roger Federer record a khum a, Grand Slam a chak tam ber a ni. Thawhtan zana inkhel dangah Alexander Zverev a chak laiin Daniil Medvedev a tla thung.
Pathianni zing dar 3:00 velah Musetti laka chak hram Novak Djokovic hian dam chiang meuh lo chungin Francisco Cerundolo a hmachhawn. Argentine 23rd seed Francisco Cerundolo lakah set la hmasa mah se set hnih a hloh zawn a, a tla teuh lehpek hle. Dinhmun chhe taka a din hnuin a ropuina a lang nawn thung a, set hnuhnung pahnih lain quarter-final a inhlangkai.
World No. 1 Djokovic hian Cerundolo lakah tha zetin bul a tan a, set khatnaah break nei zawnin game khat chiah a hloh a, awlsam takin set a la. Set khatnaah khel tha viau mah se Cerundolo er let a tuar lova, set hnih a hloh zawn. Set hnih a hloh zawn hnuin set linaah an inhnehtawk zui leh viau. Serb hian break pawimawh tak a neih a chhawr tangkai a, tie-break khelh em ngai lovin set a la thei hram a. Deciding set-ah break nei lehin set a la zui leh ta mai a, 6-1 5-7 3-6 7-5 6-3 hnehna changin quarter-final a lut.
Set hnih a hloh hnua hnehna a chang leh ta mai chu Djokovic pawhin ropui a ti ve hle, engtiang a hnehna chang let thei nge a ni tih pawh a hriat bik loh thu a sawi hial. Harsa taka a chak leh tak vangin Grand Slam ah vawi 370 chak tlingin, Grand Slam a chak ngun ber record a siam a. Grand Slam-ah record dang a hnutchhiah belh. Djokovic hian 2023 final-a a hneh tawh Casper Ruud a hmachhawn zui leh ang. Djokovic hmaa ding tur Ruud hian a khingpui Taylor Fritz chu 7-6 (8-6) 3-6 6-4 6-2 a hnehin quarter-final a lut.
Zverev a chak, Mdevedev a tla
Thawhzan zana inkhel dangah Olympic champion Alexander Zverev chuan Holger Rune a hmachhawn a, harsa taka hnehna changin quarter final a lut.
Rafael Nadal hnehna bul tan Zverev hian Denmark rawlthar Rune lakah bul a tan tha lova, set a hloh hmasa. Set khatna a hloh hnuin awlsam takin set hnihna a la. Ser thumnaah inkhel a hmuhnawm zual a, an inhnehtawk hle. Rune hian break a neih a chhawr tangkai a, set a la nawn leh a, quarter-final a hnaih hman. Set linaah an inhnehtawk lehzual a, tie-break khelh a ngai. Tie-break ah Zverev a chungnung a, deciding set ah awlsam taka chak zui lehin German fith seed Zverev hian darkar li leh minute 40 chhungin 4-6 6-1 5-7 7-6 (7-2) 6-2 in hnehna a chang hram a, quarter final a lut zui ta a ni.
Harsa taka Zverev a chak lai hian World No. 1 Daniil Medvedev chuan Alex de Minaur lakah set a lak hmasak zet hnuin 4-6 6-2 6-1 6-3 in a tlawm a, quarter-final lut zo lovin a tla. Medvedev hi French Open 2024 khelh mekah mipa lama player langsar tla hmasa ber a ni.