Record siamin Billboard 200-ah Karol G ‘Mañana Será Bonito’ a No.1

Record siamin Billboard 200-ah Karol G ‘Mañana Será Bonito’ a No.1
Karol G album ‘Mañana Será Bonito’ chu Billboard 200 (albums) chart No.1-ah a debut a, he chart-a No.1 kai thei album pakhat a neihna niin, chart record siamin, he chart-a hmeichhe zaithiam Spanish hla hlang awmna No.1 pui thei hmasa ber a ni bawk. A hmain Spanish hla hlang awmna album pahnih che he chart-ah hian a lo No.1 tawh a, Bad Bunny album ve ve niin, 2020-ah ‘El Ultimo del Mundo’ a No.1 pui a, 2022-ah ‘Un Verano Sin Ti’ a No.1 pui leh bawk.
Billboard 200 (albums) chart hi kar khat chhunga US-a album hralh that dan atanga tehin chart ranking siam a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
‘Mañana Será Bonito’ hi kar khat chhungin copy 94,000 hralhin, chung zinga copy 83,000 chu streaming atanga album hralhna tlukpui (on-demand official stream maktaduai 118.73) a tling a, album tak tak hralh zat chu copy 10,000 niin, album-a hla mal hralhna atangin copy 1,000 hu a tling thei bawk.
Karol G hi Billboard 200 chart-a a lanna hmasa ber chu 2016 kha niin, chuta tang chuan Latin genre chart-ah lamah chuan a thawm reh hman vak tawh lo a, Hot Latin Songs chart-ah pawh top 10 kai thei hla 17 nei tawhin, chung zinga panga chu No.1 a ni. Top Latin Albums chart-ah pawh No.1 kai thei album pathum a nei tawh bawk a ni.
‘Mañana Será Bonito’ hi Billboard 200 chart-a lang thei album pali a neihna niin, a album dang KG0516 (No. 20, 2021), Ocean (No. 54, 2019) leh Unstoppable (No. 192, 2017) te a nei tawh bawk.
Chart No.1 hlui SZA ‘SOS’ chu copy 87,000 hralh lehin No.1 atangin No.2-ah a tawlh ve ta a, SZA ‘SOS’ chu a zawn ni kher lovin chart-ah hian kar 10 chhung a No.1 thei a ni.
Gorillaz album thar ‘Cracker Island’ chu copy 64,500 hralhin No.3-ah a debut a, he album-ah hian zaithiam lar aw thawh an nual a, chung zingah chuan Bad Bunny, Beck, Bootie Brown, Stevie Nicks, Tame Impala leh Thundercat te pawh an aw an thawh.
Rapper Yeat album thar ‘AfterLyfe’ chu copy 55,000 hralhin No.4-ah a debut a, he chart top 10-a lang thei album pathum a neihna a ni ta.
Chart No.1 hlui taylor Swift ‘Midnights’ chu copy 48,000 hralh lehin No.3 atangin No.5-ah a tawlh a, chart No.1 hlui bawk Morgan Wallen ‘Dangerous: The Double album’ chu copy 46,000 hralh lehin No.5 atangin No.6-ah a tawlh a, chart No.1 hlui bawk Metro Boomin ‘Heroes & Villians’ chu copy 42,000 hralhin a No.4 atangin No.7-ah a tawlh ve ta bawk.
Don Toliver album thar ‘Love Sick’ chu pawh 40,500 hralh lehin No.8 a ni a, he chart-a top 10 kai thei pathum a neihna a ni ve ta bawk.
Chart No.1 hlui The Weeknd ‘Starboy’ chu 2017 hnuah a vawi khat nan top 10 a rawn khai thar leh a, copy 40,000 hralhin No.14 atangin No.9 a kai a, chart No.1 hlui bawk Bad Bunny ‘Un Verano Sin Ti’ chu copy 38,000 hralh lehin No.6 atangin No.10-ah a tawlh ve ta bawk.