Record siamin Madonna ‘CONFESSIONS II’ a No.1

On Jul 14, 2026 1 0

Record siamin Madonna ‘CONFESSIONS II’ a No.1
Madonna album thar ‘CONFESSIONS II’ chu Billboard 200 (US albums) chart No.1-ah a debut a, Madonna hian 2020s-ah No.1 album a nei ta a, 2010s, 2000s leh 1980s-ah te No.1 album a nei thei bawk a, 2020s a No.1 album nei zingah a hma lama kum 10 bi pathuma No.1 album nei thei awm chhun a la ni. ‘CONFESSIONS II’ hi Madonna album he chart-a No.1 kai thei 10-na a ni a, Madonna hi Billboard 200 leh Billboard Hot 100 (US singles) chart-a No.1 kai thei 10 chin ve ve nei thei palina a ni bawk.
Billboard 200 chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla a mala hralhna atanga album tlukpui te belhkhawm thin a ni.
CONFESSIONS II hi kar khat chhungin 1,34,000 hralhin No.1-ah a debut a, chung zinga 1,14,000 chu album tak tak hralhna niin, streaming atangin 19,000 (on-demand official stream maktaduai 20.1) a tling a, album-a hla a mala hralhna atangin 1,000 a tling thei bawk.
Madonna hian 1980s-a No.1 album pathum neiin, 2000s-ah No.1 pali leh 2010s-ah No.1 album pahnih a nei a, 1990s-ah Top 10 a lang thei album pasarih a nei a, chung zinga panga chu No.2 an kai nghe nghe a ni.
Madonna hian chart top 10-a lang thei album 24 a nei tling ta a, ani aia chart top 10-a lang thei album ngah hi panga chiah an awm a- The Rolling Stones (38), Barbra Streisand (34), The Beatles leh Frank Sinatra (32 ve ve) leh Elvis Presley (27) te an ni.
He chart-a No.1 kai thei album ngahah pawh Madonna hi 10-na niin, The Beatles (19), Drake (15), Taylor Swift (15), Jay-Z (14), Eminem (11), Future (11), Bruce Springsteen (11), Ye (11) te chiah a pha lo a, Elvis Presley nen No.1 album 10 ve ve an nei tawh a ni.
Madonna hian Billboard Hot 100 (US singles) chart-a No.1 kai thei hla 12 a nei tawh bawk a, tihian Billboard 200 leh Hot 100 chart-a No.1 kai thei album leh hla 10 chin ve ve nei thei palina a ni a, hetiang nei thei zaithiam dang pathum te chu- The Beatles (No.1 album 19 leh No.1 singles 20), Drake (No.1 album 15 leh No.1 singles 14) leh Taylor Swift (No.1 album 15 leh leh No.1 singles 15) te an ni.
Madonna hi chart No.1 hlui panga-in dawtin, Olivia Rodrigo “You Seem Pretty Sad for a Girl So In Love” chu 1,03,000 hralh lehin No.2-ah bawk a la awm a, Ella Langley “Dandelion” chu76,000 hralh lehin No.3 a la ni a, Morgan Wallen “I’m the Problem” chu 75,000 hralh lehin No.5 atangin No.4-ah a insawn a, Noah Kahan “The Great Divide” chu 62,000 hralh lehin No.6-ah bawk a la awm.
Ken Carson album thar ‘xperiment’ chu 42,000 hralhin No.7-ah a debut a, chart top 10-a lang thei album pahnih a neihna a ni a, he rapper hian nikum khan a album More Chaos chu No.1 a lo kaipui tawh bawk a ni.
Chart No.1 hlui Michael Jackson “Thriller” chu 42,000 tling lo deuh hralh lehin No.7 atangin No.8-ah a tawlh a, tihian chart top 10-ah Madonna nen an lang dun a, he chart top 10-a King of Pop leh Queen of Pop te tum khata an lan dun vawi hnihna a ni a, December ni 1, 2001 khan Jackson album ‘Invincible’ chu No.4 niin, Madonna ‘GHV2: Greatest Hits Volume 2” chu No.7 a ni bawk.
Sienna Spiro album, a full-length studio album hmasa ber ‘Visitor’ chu 39,000 hralhin No.9-ah a debut a, he chart top 10-a lang thei album a neih vawi khatna a ni.
Toby Keith album, 2002-a chart No.1 pawh lo ni tawh ‘35 Biggest Hits’ chu 39,000 tling lo deuh hralhin No.10 a rawn kai thar leh ta a. He album hi July ni 4, USA-a Independence Day boruakin a rawn tilar thar leh a, album-a hla ‘Red, White and Blue (The Angry American” chu streaming lamah a kal thar hle a ni.