Bundesliga hmahruaitu Bayern Munich chuan Inrinni zan league match pakhatah 4-3-in an mikhual Holstein Kiel an hneh a, goal hnih thuntu Harry Kane chuan league game vawi 50 khelha goal khung hnem ber nihna a hlawhchhuak thar.
England captain Kane hian first half hun pekbelhah he inkhela a goal hmasa zawk tauhlutin, second half tir lam minute 46-ah a goal hnihna a hlawhchhuak leh a, kum 2023-a Bayern a zawm hnuah league goal 50 thun tling der tawhin, he league history-ah heti zat khelha goal tilut tam ber a ni.
English striker Harry Kane hian tun season-ah Bayern Munich tan belhkhawmin match 27 a khel tling chiah a, tah chuan goal 26 a khung bakah assist ngawt pawh vawi riat zet a nei tling tawh a, season kal laiah league goal 19 a khawl tling ta bawk.
Allianz Arena mipui 75,000 hmaa Munich goal hmahruai kha first half minute 19-na leka Jamal Musiala tihluh niin, Holstein Kiel goal-veng Timon Weiner chu box chhungah Michael Olise chuan a lo tihthaih buai a, chu mi hlawkpuiin Musiala goal hi hmuh tur a awm zui ta a ni.
Goal khung har lo viau e ti loin mualneitu team hian first half an thunun nghet tlat thei bik lo a, goal khat an chhuah tih loh chu Kiel lam khan tlarhnung an veng tha ta riau a, chutih paha counter-attack rusum an thlak thin chuan Bayern tan harsatna a thlen zauh zauh zawk!
Chawlhlawk hmain sikhat bak an khung hman dawn lo emaw tih hnu hun pekbelh minute thumna a kal mek laiin England captain Kane chuan Kingsley Coman cross tauhlutin an goal hnihna a thawh a, half-time whistle-in a zui titih nghal.
Kiel kirleh beiseina hi second half an tan hnu lawkah a zuih zual sawt a, Kane bawkin minute 46-ah Raphael Guerreiro cross chu tauhlut lehin, he goal hmang hian Bundesliga chanchinah record thar a siamchhuak zui ta a ni.
Minute 54-a half-time substitute Serge Gnabry goal lawm lai hmuh tur a awm leh hnu phei chuan sili faia hmahruai Bavarians chu nuamsaa chak tura ngaih an ni hliah hliah tawh a, mahse, chuti chinah chuan an thawnthu a tawp mai ta awzawng lo!
Minute 62-ah Finn Porath chuan Manuel Neuer-a ven goal-ah an siphurh pakhat sut thenin, minute 90 pek hun pekbelh minute thum chhung lekin Steven Skrzybski chuan Kiel siphurh dang pahnih a sut zui leh ta mai a, engtin tin emaw Bundesliga lama talbuai mek Holstein Kiel chuan Munich mualah ‘comeback’ ropui an entir teuh hle a, thaw dep dep chungin mualneitu team-in hamrik hnuhnung an nghakchhuak hram a ni!
He result hmang hian league khelh 20-ah point kua zetin Vincent Kompany team Bayern Munich chuan hma an hruai fal ta a, mahse, nizan result tarlan hman loh pakhatah table-a pahnihna luahtu Bayer Leverkusen chuan an mikhual Hoffenheim laka point thum an hmuh zawh chuan a sang pahnih inthlauhna hi point rukah pawk a chhuk leh ang.
Record thar nena Bayern chakpuitu Kane
Get real time updates directly on you device, subscribe now.
Prev Post
Next Post