Red card hmu lo top football player paruk
Red card hmu lo top football player paruk
Khelmual chhung leh pawna footballer-te inthunun theihna hi an hlawhtlinna hriltu pawimawh zinga mi a ni a, discipline hrim hrim hi he game-in a ken tel pawimawh pakhat a ni.
Chhan hrang hrang avangin football player-te hian khelmualah yellow card (warning) emaw red card emaw an hmu thin a, chutih laiin footballer lar leh hriat hlawh chin zingah he thu buatsaih lai thlenga red card hmu lo an awm nual a, an zinga paruk chu bihchiang teh ang.
1. Karim Benzema
He Frenchman hian a larchhuahna leh amah chherliantu Spanish club ropui Real Madrid chhuahsana Arab team a zawm hma thleng khan a football zinkawngah inthununna khauh leh mawihnai tak a vawngnung tlat a; goal a thun theih piahlamah a khelhpuite siamsak kawngah a thawhhlawk a; team-in hun harsa a tawh laiin a talbuai ve mai mai ngai lo a, a tawpah chhanhimtu a ni fo a; a hunah tlarhnung vengtu rintlak niin, attacking third lamah a thawhhlawk bawk a, khelmual chhunga a talbuai lai hmuh tur a vang a, red card hmu lo chung hian chawl thei tak ang maw?
2. Andres Iniesta
Barcelona tan khawvela game tang leh boruak sang ber ber kum tamtak chhung khel mah se referee hnawhchhuah ngaiin a khawsa ngai lo a; Nou Camp atanga a inputchhuah hnuah Japanese team Vissel Kobe captain-te a han ni leh lawp lawp a, Asia khawmualpuiah pawh chuan red card hmu lo zawng zelin a rawn khawsa a nih kha.
Rawlthar kum 18 mi lek a nih laiin Catalan team a zawm a, talented player a nihzia khawvelin a hmu har lo. Khelmual laiah Xavi leh Busquet-te nen an inkawp thin a; rentin daih player kan tih ang mi kha niin, a discipline tha lutuk avangin red card nen an inhnimhnai ngai lo!
3. Michel Platini
A vanglaia khawvel footballer tha berte zinga chhiartel a ni a, kum 1970 bawr chho kha footballer a nihna zawna a lar vanglai a ni. Midfielder a ni thin a, Balon D’Or chawimawina pawh vawithum ngawt dawngin, a career-ah club tan game 580 a khel tling a, ram tan pawh match 72 khelin, red card hmu loa chawl zingah chuan a langsarber pawl a ni awm e.
4. Philip Lahm
Palian ni lo mah se he fullback hlui hi khawvela defender hmuhnawmberte zinga pakhat a ni thin. Kum 16 chuang a inkhelh chhung khan game 700 chuangah yellow card chu tum 60 lai hmu ve bawk mah se red card hmu lo zawngin a tlingtla thei.
5. Gary Linekar
A lar a, English football player ni mek leh ni tawh zinga hlawhtling leh ngaihsan hlawhberte zinga mi a ni. Linekar-a inkhelh hun lai hi lehlam pawl defender-te rorum zual hun lai niin, striker/forward dan an tumna kawngah foul ngah hle thin mah se hrem an ni zen zen ngai lo a, striker-te tan chuan insum harsa tak tur a nih laiin Linekar hi chuan buaina pumpelh zawngin amah vengtu defender rothap tak tak a paltlang fo a, red card hmu loin a chawl thei.
6. Joao Moutinho
Wolverhampton Wanderers tana game 1000 chuang khel thei player zinga pakhat niin, red card hmu lo zawnga heti chen a khawsa thei hi player danglam bik a nihna pakhat a ni.