Red Sea-ah Houthi-in lawng bei thar leh

Yemen-a Houthi ni ngeia ngaihten Liberian flag intarna bungraw phur lawng chu Red Sea-ah an bei a, a thawk mi pathum thiin pahnihin hliam an tuar bawk niin European Union lawng sipaiten an sawi.
Lawnga sumdawnna kawngpui ber, Red Sea-ah hian Pathianni khan Houthi hian lawng an beih thu an sawi tukah Greek ta, Eternity C hi Thawhtanni zan khan beih leh a ni.
Houthi hian an tih a ni tih an la sawi lo va, Yemen-a US Embassy leh EU sipaite erawh chuan an tihah an puh.
“Houthi hian rawng taka mihring nunna la lehin Red Sea-a zalen taka kal velna an tibuai,” tiin embassy chuan Thawhlehni khan a sawi.
“Khawvel huap tuipuia kal velte an that leh hian Houthi-te hawi lam dik tak a tilang a ni,” an ti bawk.
Houthi-te hian Israeli sipaiten Gaza an beihna an duh lohzia lantir nan Israel nena inzawm lawng liante an bei thin.
Pathiannia Magic Seas an beih hnuah Houthi hian Israel nena thawhhona nei company-te lawng chu ‘an tum ber’ a nih thu an puang.
“Israel-in Gaza an beih leh an danchahna hi a tawp hma chuan Red Sea leh Arabian Sea-a Israeli kaihhnawihte hi kan bei zel ang a, Umm al-Rashrash (Eilat) lawngchawlh hmun pawh kan tibuai zel ang,” an ti.
Lawng pahnih beihna thleng pahnih hi hun eng emaw chen he lawng kawnga veivah a tlem hnua a tam thar leh lai tak a ni.
Israel thawhpui hnai tak, EU chuan Pathiannia beihna hi an dem thu an sawi.
US President Donald Trump-a sorkar chuan kumin kum tir khan Yemen hi a bei vak a; mahse, Washington leh Houthi hian May-ah inkahhai puangin Yemeni pawl hian US lawng beih pawh a titawp.
November, 2023 leh January, 2025 inkar khan Houthi hian lawng 100 chuang missile leh drone hmanga beiin pahnih an tipil a, mi pali an thi a. Lawng an beihna hian khawvel sumdawnna kawng pawimawh, Red Sea-a lawng kal vel a titawp deuh thup a ni.
Tun hnaiah lawng kal hi pung leh hret mah se a hma ang erawh a la ni phak lo.