A vawi hnih nan Gaza sawiin Trump leh Netanyahu inbe leh

A vawi hnih nan Gaza sawiin Trump leh Netanyahu inbe leh
US President Donald Trump leh Israeli Prime Minister Benjamin Netanyahu-a chu Thawhlehni zan khan Gaza-a indona awm mek sawi dunin a vawi hnih nan an inkawm leh.
Hetih lai hian Trump-a Middle East envoy Steve Witkoff-a chuan Israel leh Hamas hian ni 60 inkahhai puang turin mutan pakhat chauh an nei tawh tih a sawi.
Netanyahu-a hian Thawhlehni tlai dar 05:00 (India-a Nilaini zing dar 02:30) khan White House thlengin an inkawm nghal a, chanchinbumite erawh tel phal an ni lo.
Thawhlehni vek khan Netanyahu-a hi Vice-president JD Vance-a nen an inkawm tawh a. Trump-a nen pawh hian Thawhtanni zanriah chu White House-ah kil dunin eng eng emaw an sawi dun bawk.
Tun hi Trump-a a sorkar leh hnua Netanyahu-a’n US a tlawh vawi thumna a ni.
Hruaitu pahnihte hi darkar hnih vel an inbia.
Netanyahu-a hian Republican House of Representative Speaker Mike Johnson a hmu bawk.
An inbiak zawhah Israeli prime minister hian Israel-in sipai chakna hmanga Gaza an beihah an tih tur an la hlen lo nia a ngaih thu a sawi a, hetih lai hian palaite chuan inkahhai a awm theih nan ‘an buaipui mek.’.
“Gaza-ah hna kan la thawk zo lo va, mi hren chhuah, Hamas siipai leh sorkar chhut chimih vek an la ni lo,” a ti.
Witkoff-a chuan Israel leh Hamas hian inkahhai puang tura inrem lohna pakhat an la nei a, ni 60 chhung inkahhai hi tun kar chhunga tihfel ngei a beiseiawm tih a sawi.
“Thil paliah inrem lohna awm chu tunah chuan pakhat chauh a ni tawh,” tiin a sawi.
Inkahhai inremnaah ruahmanah hian mi hren dam lai 10 leh thi tawh ruang pakua hruai haw a tel tih a sawi.
Hamas leh Israel inbiakna hi Pathianni atanga tan kha a ni.
Gaza-a indona hi October 7, 2023-a Hamas-in Israel beia mi 1,200 chuang an thah leh hren tura mi 251 an hruai atanga intan kha a ni a. Israel-in bei let zuiin mi 57,500 vel an thi tawh.