Nilai zana English Premier League (EPL) khelhah Liverpool chuan Anfield-a an mikhual Fulham chu si khat faiin an hneh a, champions league khelh phak beiseina sang zawk an nei thar.
Table-ah panganaa awm mek Liverpool hian Fulham chu Anfield-ah an mikhual a. Fulham lakah an chak a nih chuan an chunga awm Manchester United an hnaih lehzual vangin chak an tumruh hle. An mikhual Fulham hi na takin an nawr a. Chawlhlawk hmangin goal an thun. Fulham player Issa Diop chu Liverpool forward Darwin Nunez lakah a foul a, penalty a chawi. He penalty hi minute 39-naah Mohamed Salah chuan si nghak Berd Leno paltlangin a pet goal a, hmahruaina goal a thun. Aigupta tlangval Salah goal thun hmang hian si khat faia hmahruai chungin chawlhlawk an hmang.
Chawlhlawk hnu lamah pawh Jurgen Klopp-a team Liverpool hi an khel tha zui viau a, na taka an mikhualte nawr in, goal thun theihna hun tha pawh an neih belh. Trent Alexander-Arnold leh Luis Diaz ten an hun tha neih an chhawr tangkai zo lova, goal an thun belh thei lo. Goal thun belh thei bik lo mah se an goal thun an venghim a, an mualah hnehna pawimawh tak an chang zui ta a ni.
Fulham lakah point thum an hmuh vangin Reds hian top 4 huang an hnaih leh zual sauh a, palinaa awm mek Manchester United nen an inkarah point li a tla zep mek. United hian nizan khan Brighton an hmachhawn a. Brighton an hneh chuan an hmelma lian ber Liverpool hi point sarih zetin an kalsan ang a, khel tlem zawk an nih bawk vangin palina ni chiang tluk an ni hial tawh thung ang.
Reds in top 4 an hnaih
Get real time updates directly on you device, subscribe now.
Prev Post
Next Post