City in Arsenal an lehpel leh nghal

May 3, Nilai zan khan English Premier League 2022-23 khelh chhunzawm niin, champion lai Manchester City chuan si thum faia West Ham United sawpin, Arsenal an lehpel a, Table chung berh an kir leh nghal. City in si thum fai ngawta West Ham an sawp tum hian Erling Braut Haaland chuan goal khat a thun a. EPL-ah season khata goal thun hnem ber record thar a siam.
Table chung berah kir leh tura chak mamawh Manchester City hian Table hnuai lamah awm a, him tuma tan khawh mek West Ham Unite chu Etihad Stadium-ah an mikhual a. An mikhual lakah khel tha viau mah se chawlhlawk hmain goal an thun thei lo zet a. Chawlhlawk hnu lamah goal thum ngawt an thun ta thung.
Second half-ah goal thun ngei tumin City in tan an khawh a, goal pawh an thun ta thuai. Jack Grealish free kick hlawhchhuah chu Riyad Mahrez chuan tha zetin a pet a. Mahrez free kick chhuih tha tak hi defender Nathan Ake chuan minute 49-naah chiang zetin a tauh goal a, hmahruaina goal a thun. Chak zawk tura rinkai, an muala inlan leh nghal City in goal an thun hmasak vangin chak tuma inelna a zo deuh dera ngaih a ni a. Inkhel entute zawhna awmchhun chu ‘City hian engzat tak thun belh ang maw le’ tih a ni ber tawh.
An mikhual lakah goal an thun vangin champion lai City chu inringtawk zual zawkin an inlan a. Tlakhniam pumpelh tur point khat tal an tan a pawimawh em vangin West Ham in goal thun ngei an tum a, si phurh belh huamin an khingpuite an nawr ve bawk. Hammers in an nawr luat an tuar lova, City nawr let an dang zo lo. Pep Guardiola team te hian minute 70-naah fuh zetin an mikhualte an nawr let a. Jack Grealish ball pek tha tak um tlangtu Erling Braut Haaland chuan inringtawk tak, fing, mawi leh tha zet siin si nghak Lukasz Fabianski a pet khuma an goal hnihna a thun. Minute 70-naah hian football ngainatute hmuh chak a thleng a. Football ngainatute mit fuk rawn thuapna Haaland chuan goal a thun a, EPL record thar a siam ta nge nge.
Haaland goal thun hnuin City an khel tha chhunzawm a, West Ham hin hlauhawm siam tur khawpin an nawr let hleithei meuh tawh lo. Hammers in goal thun an mamawh em em laiin goal an chhuah belh leh cheu a. Hun tawp dawn hnaih minute 85-naah Phil Foden chuan tawih zetin a pet goal a, an goal thumna a thun. Foden goal thun hnu hian goal dang a luh belh thei tawh lova, City chuan an mualah si thum faia hnehna changin point thum hlutak an hmu.
An mualah chak a, point thum an hmu leh tak vangin champion lai Manchester City in champion nawn leh an hnaih deuh deuh zel. City hian khelh 33 atanga point 79 hmuin table chung ber an luah a. An hnuai chiaha awm Arsenal nen an inkarah point khat a tla zep mek. Arsenal nen an inthlauhna tlem viau mah se City hian vawi hnih ngawtin Gunners aiin an khel tlem zawk thung a. An khel tlem zawkna hnawhkhat a, an chak ve ve a nih chuan City hi champion tur an ni a. An champion leh champion loh hi an kuta innghat liau liau a ni tawh a, an kut khing lehlama trophy an dawm der der tawh hi thlauh keh an tum hauh lo ang.
West Ham laka City goal thumna Phil Foden-a thu kha Pep Guardiola-a’n kum 2016 a City a enkawl atangin City goal 1000 na chiah a ni.
EPL record siamtu Haaland
Manchester City in 2022 nipui bazar laia an lak Erling Braut Haaland chu forward tam tak talbuaina thin English Premier League-ah ropui takin a inlan a. Kum 22 mi lek Haaland hian season khat em pawh a hman zawh hmanin EPL-ah record thar a siam nual tawh a. Khawvela tualchhung league ropui leh league harsa ber tia an sawi thin EPL-ah meuh pawh vengtu nei lo ang maiin goal thun a thulh hleithei meuh lo.
Norway forward Haaland hian West Ham laka City goal hnihna a thun hmang khan EPL-ah season khata goal thun hnem ber record thar a siam a. Season khatah goal 34 ve ve lo thun tawh Andrew Cole leh Alan Shearer te record thaichia in, EPL-a season khat a khelhna lekah goal 35 a thun tling der tawh a. Langsar takin EPL record thar a nem kai. Cole leh Shearer record khum turin Haaland hian goal 35 thun tling turin game 31 chiah a mamawh.
EPL-ah season khata goal thun hnem ber record a siam hmain Haaland hian EPl-ah goal 20 thun tling rang ber record a lo siam tawh a. EPL-ah game 38 a awm hnua goal thun tam ber Mohamed Salah record a lo khum fel diam tawh a. Haaland lal ram hi EPL chauh a ni lova, champions League-ah top-scorer a ni mek a. UCL-ah hian goal 20 thun tling rang ber record a siam tawh nghe nghe. Season kal mek hi Haaland a season a ni deuh chawt a. Inelna hrang hrangah City tana goal thuntu langsar tak chu Haaland bawk hi a lo ni leh thin. City hi tre-ble champion ni thei dinhmunah an ding mek a. EPL, FA Cup leh Champions League-ah an champion a nih ngat chuan an champion theih nana thawhhlawk Haaland hian mimal chawimawina sang a dawng ngei tura ngaih a ni.
EPL record thar a siam hnu hian City atan a khelhpuite chuan Haaland hi zahna chibai bukin, mual chhungah mawi takin chawimawina an hlan a ni. Goal thun lama inthlahrunna nei map lo Haaland hian record hrang hrang siamin, football khawvelah a hming a lian zual deuh deuh dawn niin a lang a. Haaland faka zai a chawl thei meuh si lo.