Reds mualah Red Devils

International break a zo va, tualchhung league khelh chhunzawm a ni leh nghal dawn. English Premier League-ah inkhel ngaihven hlawh tak a awm a, chu chu Pathiani zan (Super Sunday) ah club inhal em em Liverpool (Reds) leh Manchester United (Red Devils) te inhmachhawn tur a ni.
Champion lai Liverpool hi champion leh tura rinkai an ni a, nipui bazar laiin an squad thuamchak nan sum pawh an seng hnem hle. Rinlawk ang ngeiin season tharah bul an tan tha a, hun tawp dawnah an chak thei hle. Hun tawp dawna chakna goal an thun hmangin an khelh chhiat niah pawh point thum an hmu leh mai zel. Hun tawp dawn hnaiha goal an thun hmanga an chak theih em vangin an chezia hi a champion zia viau. Reds hian table-ah hma an hruai deuh reng a, Arsenal lakah an hmahruaina an hlauh ta tlat thung.
Hun tawp dawnah chak an thiam chho viau emaw tih laiin Liverpool hi an match hnuhnung pathumah tlawm zawkah an tang ta vek thung. EPL-ah Crsyal Palace leh Chelsea te an hneh lo zawn a. Champions League-ah pawh Galatasaray hneh lovin an tlawm ringawt bawk. Vawi thum ngawt an tlawm zawn hnuin an hmelma lian ber Manchester United an hmachhawn zui dawn a. Pathianni zanah fiahna hautak an hmachhawn a ngai dawn.
Liverpool ang lo takin Manchester United in season tharah bul an tan chhia a, table-ah 14-na te an luah zak zak. Bul tan chhe mah se an insiamtha chho hret hret a, tunahchuan 10- huangah an awm phak der tawh. United hi an match hnuhnung vawi ngaah vawi thum an chak a, tlawm zawkah vawi hnih an tang. An match hnuhnung berah Liverpool an tlawm laiin United hi chuan an match hnuhnung berah hnehna an chang a, 2-0 in Sunderland an hneh. Sunderland an hneh hnuin table-ah hma an sawn a, 10-naah an awm mek.
An match hnuhnung berah hnehna chang bawk mah se United hi Mimualah an khel chhe zawn viau a, an chak hlei thei ta meuh lo. Anfield-ah phei chuan record an nei chhe leh zual a, Anfield a Liverpool an hmachhawn hnuhnung vawi kuaah chak an nei lo vek. Kumin January thlaah khan Liverpool nen hian Anfield-ah 2-2 i an inhnehtawk a, hei hi tunhnaiah Anfield-a an result tha ber a ni. Nipui bazar inhawn laia an player leite an tlangnel tan a, hei hian Liverpool lakah chak theih beiseina sang zawk a pek ngei a rinawm.
Khelh 7 atanga point 15 hmu mek Liverpool hian an mikhual Manchester United an hneh a nih chuan table chung ber luah let leh theihna hun remchang an nei thei dawn. An chung chiaha awm Arsenal in inrinni zanah Fulham an hmachhawn. Gunners hian tunhnaiah Fulham hneh an harsat thin. Arsenal hian Fulham lakah point an hlawhchhuak zo lo a nih a, Liverpool in United an hneh bawk si a nih chuan Reds hi hmahruaitu thar an ni thei dawn.
Liverpool in pahnihna an luah laiin Manchester United erawh chuan 10-na an luah ve tawl thung. Reds lakah an chak a nih chuan table-ah hma an sawn deuh dawrh ang a. Anfield-ah a tlawm a nih erawh chuan an hnungtawlh ngeiin a rinawm thung.
Reds leh Red Devils te hi inelna hrang hrangah vawi 216 an inhmachhawn twha vawi 83 chakin United an chungnung zawk mek.